ANDAM na ang Davao del Norte Provincial, City ug Municipal Health Offices alang sa dungan tulo ka adlaw nga Bayanihan Bakunahan sa tibuok nasod karong Nobyembre 29 hangtod Disyembre 1, 2021.

Sa gipahinabo nga Bayanihan Bakunahan planning workshop niadtong Nobyembre 22, gipasabot ni Provincial Vaccination Operation Center Head Dr. Eleanor Salva nganong bisan holiday (November 30) kinahanglang motrabaho sila.

“Nganong giapil man nang 30 nga holiday? Giapil na nga holiday kay National Heroes Day na siya. And we consider nga magiging hero pod ta kay bisan holiday manarbaho man ta. So considered ta nga hero ana nga adlaw,” matod ni Dr. Salva atubangan sa mga city ug municipal health officers, administrators ug mga frontliners gikan sa 11 ka LGUs sa probinsya.

Ilabinang gikinahanglan sa tibuok Davao del Norte nga mohimo gyod og “dinalian” nga pagpangbakuna sanglit hangtod niadtong Nobyembre 21 nga semana anaa lamang sa 34.5% ang fully vaccinated samtang 48.6% ang nakadawat og first dose sa 744,405 ka tawo nga angay bakunahan aron maabot ang “herd immunity.”

Gikan pagsugod sa RESBAKUNA niadtong Marso 2021 hangtod semana sa Nobyembre 21, ang LGU Sto. Tomas ang dunay pinakataas nga vaccination rate nga 42.6% fully vaccinated ug 60.5% ang nakadawat sa first dose. Ang lungsod sa Talaingod mao sab ang pinakaubos vaccination rate nga 12.5% (fully vaxxed) samtang 14.8% ang nakadawat og first dose, hinungdan nga ang tibuok probinsya duna lamang 34.5% vaccination rate.

Halayo kini sa national average nga sobra 44% (kumpletong nabakunahan) ug sobra sab 55% ang nakadawat sa first dose.

Sa tulo ka adlaw (Nob 29-Dis 1)nga Bayanihan Bakunahan, target sa tibuok pwersa sa hiniusang mga frontliners sa Davao del Norte ang pagbakuna sa 168,704 o’ 56,235 ka tawo matag adlaw.

Nanawagan ang PHO sa tanang wala pa’y bakuna nga moadto na sa ilang mga health centers ug mga vaccination sites aron mabakunahan kontra COVID-19.

Ingong tabang sa mga LGUs, sa iyang bahin, ang Provincial Health Office mihimo og regular RESBAKUNA ni Kuya Gob diha sa Clubhouse, Capitol compound matag Huwebes (first dose) ug Byernes (second dose).

Miabot sab ang RESBAKUNA ni Kuya Gob mobile vaccination sa Barangays Tanglaw ug Cabay-angan sa Braulio E. Dujali ug Mesaoy sa New Corella.

Niadtong adlaw’ng Martes (Nob 23) gibakunahan sab sa RESBAKUNA ni Kuya Gob ang 105 ka mga Persons with Deprived Liberty (PDL) diha sa Provincial Jail. [with pix from DILG Yam]

****************///

 

 

 

DavNor News

nainggo