MIABOT sa 690,248 ang rehistradong botantes sa tibuok Davao del Norte alang sa Mayo 9, 2022 nasyonal ug lokal nga eleksyon.
Kini maoy 13.9% nga pagtaas niadtong 2016 nga 84,605 kumpara sa 605,605 rehistradong botantes sa tibuok probinsya niadtong 2019.
Sa rekord sa DavNor Commission on Elections (COMELEC) Provincial Office, ang Distrito I nga gilangkoban sa mga lungsod sa Talaingod, Kapalong, New Corella, San Isidro, Asuncion ug ang syudad sa Tagum adunay katibuk-an 337,583 nga gidaghanon rehistradong botantes samtang ang Distrito II nga gilangkoban sa Sto. Tomas, Braulio E. Dujali, Carmen, Panabo City ug Island Garden City of Samal (IGACOS) dunay 352,665 nga kwalipikadong mosalmot sa piniliay karong sunod tuig.
Sa gihapon, ang sentro sa DavNor nga Tagum City ang dunay pinakadaghan rehistradong botantes nga 172,100 nga gisundan sa Panabo City 127,668 ug sa syudad-isla IGACOS nga 84,194 samtang ang dakong lungsod sa Sto. Tomas dunay pinakadaghan rehistradong pumipili nga 73,248.
Sa Mayo 9, 2022 eleksyon, sa probinsyal nga mga posisyon mag-atbang pagka-gobernador ang incumbent Gobernador Edwin “Kuya Gob” Jubahib kang Board Member Roy Catalan ug sa pagka-bise-gobernador magtigi sab si incumbent Board Member Franklin Gentiles ug kanhi Tagum City konsehal ug negosyanteng De Carlo “Oyo” Uy. 11 ka kandidato ang mag-ilogay sa lima ka pwesto sa pagka-board member sa District I samtang 13 sab ang mag-derby alang sa laing lima ka pwesto pagka-board member sa District II sa Davao del Norte. Sa pagka-kongresista sa Distrito I, tulo ang mag-ilogay lakip ang usa ka independent candidate samtang one-on-one ang duha ka kandidato nga mag-atbang alang sa pagka-kongresista sa Distrito II.
Sa miaging 2019 nga eleksyon, ang Davao del Norte dunay katibuk-ang 79% nga voter’s turn-out. Halos magka-parehas lang ang voters’ turn-out sa babae nga .7908 (240,527 aktwal mibotar sa rehistradong 304,142) ug sa lalaki nga mga botantes nga .7943 (239,501 aktwal mibotar sa rehistradong 301,502). Ang taliabot 2022 nga piniliay giisip nga “hagit” sanglit ang tibuok nasod anaa sa COVVID-19 nga pandemya.
Hangtod ning pagsulat wala pa matino ang pinal nga gidaghanon sa mga voting centers ingon man sa mga lokasyon ingon man ang katibuk-ang gidaghanon sa rehistradong babaye ug lalaking botantes.
Kahinumdoman nga human gayod sa COC filing niadtong Oktubre 8, nanawagan si COMELEC XI Regional Director Atty. Michael C. Abas sa tanang kandidato ug mga dumadapig nga dili mag-una-una og pangampanya ug mahimong “patas” (fair) sanglit wala pa moabot ang campaign period nga Pebrero 8- Mayo 7 alang sa nasyonal posisyon ug Marso 25-Mayo 7 alang sa local nga mga posisyon.
Sa datos sa COMELEC ang tibuok nasod dunay 65,745,529 rehistradong botantes para sa 2022 nga eleksyon.
******************///
