HANGTOD ning pagsulat Enero 12, ang lungsod sa Braulio E. Dujali, Sto. Tomas ug Tagum City pa lamang ang nakaabot sobra 70% sa ilang target populasyon fully-vaccinated, kun duha ka beses bakuna kontra COVID-19.

Sa datos gikan sa Department of Health Regional Office XI, ang lungsod sa Braulio E. Dujali naka-first dose bakuna sa 18,464 ka tawo kun 83.7% sa target nga 22,049, ang 70% sa iyang populasyon nga 31,499 aron makab-ot ang “herd immunity.” Miabot na sab og 16,481 ang nabakunahan og second dose kun 74.7% sa target.

Ang silingang lungsod sa Sto. Tomas nakabakuna og 70,359 alang sa first dose kun 80.9% sa target nga 86,979 ka tawo ug 60,850 nga nakadawat og second dose kun 70% sa target. Ang Syudad sa Panabo naka-first dose na sab og 110,618 ka tawo nga 81.8% sa target nga 135,207. Ang fully-vaccinated (two doses) miabot og 92,852 nga 68.7% sa target.

Sa Distrito 1, ang Tagum City ang nanguna sa paghatag first dose bakuna sa 163,571 kun 86.1% sa target nga 190,029. Nakabakuna sab og 132,999 alang sa second dose kun 70% sa target.

Pinaagi sa DavNor Provincial Health Office naningkamot pag-ayo ang administrasyon ni Gobernador Edwin “Kuya Gob” Jubahib nga bisan maka-fully-vaccinated (kaduha nabakunahan) kontra COVID-19 ang 744,405 ka tawo aron maabot ang 70% “herd immunity” sa populasyon nga 1,063,436. Giplano na karon sa administrasyon nga ihatod pagbalik ang daghang serbisyo pinaagi sa Oplan TApok sa Barangay Alang sa Nanginahanglan ug Galisod (Oplan TABANG) niadtong mga lugar nga mga hilit (GIDAS-Geographically Isolated Depressed Areas) nga naundang gumikan sa pandemya niadtong 2020. Giplano sab nga kadtong mga lugar nga nakakab-ot na sa “herd immunity” ang hatdan sa mga serbisyo. Hinuon nagdepende kini sa kahimtang sa kaso sa COVID dinhi sa probinsya.

Padayong nanawagan ang PHO sa pagpanguna ni Dr. Alfredo Lacerona nga magpabakuna na kadtong wala pa gyod makadawat sanglit “daghang suplay sa bakuna ang kapilian” ug halos matag adlaw dunay ipahigayon nga vaccination diha sa matag LGU sa Davao del Norte nga naghatag first, second ug bisan booster shots niadtong angayan na modawat niini.

Gawas sa Davao City, ang Davao del Norte ang dunay pinakataas nga nakab-ot kung labot sa kampanya nga RESBAKUNA taliwala sa lima ka probinsya sa tibuok Rehiyon XI.

******************///