Kay naghimo’g kasamok ug nilapas sa health protocol, gipa-undang ni Davao del Norte Governor Edwin “Kuya Gob” Jubahib ang rally sa Northern Davao Electric Cooperative (NORDECO) atubangan sa Kapitolyo.

Dali nga nabungkag ang kapin libo nga mga raliyista human sila gitagaan og ultimatum ug gisaway ni Kuya Gob sa ilang bagang panagtapok nga walay social distancing ug daghan pa jud kanila ang walay face mask.

Gikondenar niya nga dako kining pagpanglapas sa safety protocols, labi na kay sugod na pud og saka’g balik ang mga bag-ong kaso sa Covid-19 sa lalawigan.

Gibutyag niya nga iyang gipa-ubos sugod karong adlawa ang Alert Level 3 sa tibuok probinsya, sa bisa sa Executive Order No. 2, series of 2022, aron mapugngan ang pagdaghan na pud sa mga kaso sa Covid-19.

Ang rally, nga gi-organisa sa Coalition Against Privatization Electric Cooperatives (CAPECs), nagtumong sa pagbabag sa House Bill 10554, diin mihanyag nga ibalhin ang walo ka mga lugar ubos sa prangkisa sa NORDECO ngadto sa Davao Light and Power Company (DLPC).

Kini milangkob sa Tagum City, Island Garden City of Samal, Asuncion, Kapalong, New Corella, San Isidro, ug Talaingod sa probinsiya sa Davao del Norte, ug Maco sa Davao de Oro.

Sulti ni Kuya Gob nga dapat sa Kongreso mipasibaw sa ilang gibati ang mga raliyista.

Kahinumduman nga mi-file og petition si Kuya Gob, kauban ang mga mayores ug kapitanes sa maong LGUs sa Davao del Norte, nga mohawa na sila sa Nordeco tungud sa dugay nang mulo sa katawhan nga way ayong serbisyo niini, sige’ng brownout, taas nga singil sa kuryente ug dugay nga pag-aksiyon sa mga reklamo.

“Ang among petition para sa kaayuhan sa katawhan. Kini para sa inyuha tungud sa kamahal sa charges, system loss, generation charge, sige’ng brownout, walay maayong serbisyo sukad pa kaniadto hangtud karon. Ug kamo baya ang apiktado ani,” sulti ni Kuya Gob.

Sa pagbutyag sa pila ka mga raliyista nga gipasaligan sila sa mga organizers nga tagaan og P420 kada usa sa ilang pagtambong, mihangyo si Kuya Gob nga dili sila magpadala sa mga tawo nga naglipay sa kamahal sa kuryente sa Nordeco.

“Ayaw palinlang sa tag-P400 nga gibayad matag-usa kaninyo... usa ra na ninyo ka lutu-an pero pila ka tuig mo mag-antos,” ingon sa gobernador.

Kauban ni Kuya Gob si Mayor Allan Rellon sa pagsaway sa mga organizers sa wala nila pagsubay sa protocols, ilabi na kay mitala na og pagtaas sa mga kaso sa virus sa dakbayan.

Gibutyag sa mayor nga duna nay 119 active cases ang Tagum City gikan sa 23 ka bag-ong kaso sa milabay nga January 1, 2022.

“Hangyo ko sa inyoha nga, ato-a man kining Constitutional rights, pero dili nato isakripisyo ang kinabuhi sa atong katawhan, ilabi na nga nag-imbita mo sa tagalain nga lugar,” saway sab ni Mayor Rellon.

 

 

 

 

 

DavNor News

nainggo