Dako ang kalipay sa mga persons with disabilities (PWDs) ug mga senior citizens human nila naangkon ang libreng wheelchair ug mga assistive devices gikan sa Probinsyal nga Panggamhanan sa Davao del Norte, Enero 13 ni’ng tuiga.

Tumong sa administrasyon ni Kuya Gov. Edwin I. Jubahib nga mahupay ang pag-antos sa mga PWDs ug senior citizens pinaagi sa tabang sa gobyerno ubos sa programa sa Provincial Social Welfare and Development Office (PSWDO) nga nahisubay sa Republic Act No. 7277 o Magna Carta for Disabled Persons ug Republic Act No. 9994 o Expanded Senior Citizen Act.

Halos mutulo ang luha ni Jimmy Bongcalas usa ka PWD nga taga Barangay Palma Gil sa Lungsod sa Talaingod sa dihang nadawat niya ang iyang wheelchair. Dakong tabang matud pa ang iyang nadawat nga kahimanan sa iyang sitwasyon nga adunay balatian hinungdan nga siya maglisod paglakaw.

“Daghang salamat kay Kuya Gob Edwin I. Jubahib nga nag-render gyud og social services sama niini nga wheelchair alang sa akong amahan nga adunay kalisdahan sa paglakaw tungod sa iyang sakit”, pagpasalamat ni Rolando, anak sa senior citizen ug benepisyaryo sa wheelchair nga si Presco Abenion, lumulupyo sa Barangay Asuncion, Lungsod sa Carmen.

Sumala sa datos sa PSWDO, kapin 1.4 million pesos nga kantidad sa mga assistive devices ang nahatag sa 95 ka PWDs ug 97 ka senior citizens. Kini naglangkob sa 117 wheelchairs nga pang-dagko, 1 wheelchair nga pambata, 5 crutches, 53 walkers, ug 17 canes.

Alang sa tuig 2022, lain na sab nga batch sa mga PWDs ug senior citizens ang pwede mahatagan og assistive devices.