Di malimod sa nagpahiyom nga mga panagway ang kalipay nga gibati sa mga kabataang estudyante sa Moling Elementary School sa Sitio Moling, Gupitan, Kapalong, Davao del Norte samtang sila misugat sa mga bisita ug midawat sa mga kahimanan nga gitunol kanila sa mga empleyado ug personahe sa Bureau of Internal Revenue (BIR) Revenue District Office No. 112 sa siyudad sa Tagum kauban sa Philippine National Police Academy (PNPA) Sandigan Class of 1994 niadtong Enero 13, 2022.

Lubak-lubak ug dalin-as ang dalan, hinungdan nga lisod ug mas milayo ang byahe. Apan wala kini nahimong rason nga mababagan ang pagbisita sa tulonghaan sa maong Sitio sa panguna ni Revenue District Officer Eddie Leo A. Galera II. Matod niya, ang gipahigayon nga outreach program nagsugod lamang sa sugyot sa usa ka trabahante apan ila kining gilantaw nga usa ka responsibilidad alang sa komunidad.

Igmat usab nga mitubag sa maong sugyot ang PNPA Sandigan Class of 1994 nga mihatag ug dakong pinansyal nga suporta aron mapalit ang mga gamit pang-eskwelahan, tsinelas, pagkaon ug uban pang galamiton sa mga kabataan. Nahimong usa ka halandumong higayon usab ang maong programa tungod sa unang higayon nakatilaw ang mga kabataan sa Sitio Moling og ice cream ug burger nga ila lamang nahibal-an gikan sa ilang mga magtutudlo o nabasa sa mga libro sa eskwelahan.

Mapasalamaton ang Public Schools District Supervisor sa Langilan District nga si Dr. Ronnie A. Publico, ingon man ang School Head sa Moling Elementary School nga si Rhiza Mae E. Alilaya, mga magtutudlo, mga ginikanan ug labaw sa tanan, ang mga kabataan sa pinakaunang higayon ug talagsaong opportunidad nga sila matunolan sa maong kaayohan.

Tinguha sa BIR Revenue District Office No. 112 nga sinugdanan lamang kini sa daghan pang higayon nga sila bug-os nga makaserbisyo sa publiko’ng nanginhanglan.

Sa gihapon napamatud-an ang tiubay nga diwa sa panaghiusa pinaagi sa pagtinabangay sa katawhan sa probinsya sa Davao del Norte.