One Team ang Probinsyal nga Panggamhanan sa pagpang-apod-apod ug packed meals ngadto sa katawhan sa Barangay Cabaywa, Asuncion nga hilabihan ka-apektado sa pagbaha gumikan sa pila ka-adlaw nga sige ug ulan sa probinsya.

Gipangunahan ni Kuya Gov. Edwin I. Jubahib ang pagsend-off sa grupo ngadto sa nasampit nga barangay human sa survey ug monitoring nga gihimo sa Provincial Social Welfare and Development Office (PSWDO) ug rescue operations sa Provincial Administrator’s Office-Provincial Disaster Risk Reduction and Management Division (PDRRMD) kung diin ang buhatan nagpadala sab og rescuers ug truck with rubber boat.

Niboluntaryo mismo ang mga board members sa distrito uno nga sila Hon. Nicandro “Nickel” Suaybaguio, Jr., Hon. Prospero “Popo” Estabillo, Jr., ug Hon. Roger Laguna sa pagtunol sa maong ayuda. Anaa sab sa maong kalihokan ang representante ni Cong. Pantaleon Alavarez nga si Dr. Joseph Nilo Parreñas ug mga kaubanan niini. Nang-apod-apod sab ug mga face masks ang mga personahe sa kapitolyo ug kanunay nga nagpahinumdum sa katawhan sa pagmentinar og social distancing.

Bisan pa man padulong na sa paghubas ang tubig baha, gisaad sa Probinsyal nga Panggamhanan pinaagi ni Provincial Administrator Engr. Josie Jean R. Rabanoz ang ayuda nga food packs nga adunay bugas, canned goods ug uban pang panginahanglanon nga iapud-apod dayon ugmang adlawa, Enero 18.

Dako ang pasalamat ni Punong Barangay Lydia L. Mercado sa abtik nga pag-aksyon sa probinsya. Matud pa niya, nanggawas gyud ang mga lumulupyo sa ilang mga panimalay kay nakabalo sila nga sa oras nga aduna silay panginahanglanon, anaa sa kanunay ang probinsya ubos sa liderato ni Kuya Gov.

Dugang pa sa kapitana, ang maong pagbaha karon lang nila nasinati ug balik kay gikan sa paglingkod ni Kuya Gov, wala na sila gibaha tungod sa mga programa sa probinsya sama sa Oplan Canal.

 

 

 

 

 

DavNor News