Maabtikong gipakita sa Probinsyal nga Panggamhanan sa Davao del Norte ang paspas nga pagtunol og tabang ngadto sa tanang apektadong residente sa pagbaha sa Barangay Pagsabangan sa Dakbayan sa Tagum ug Barangay Buclad, Sagayen, Cabaywa, Concepcion ug Doña Andrea sa Lungsod sa Asuncion, Enero 18.

Ang pagpang-apod-apod sa mga packed meals ug food packs nga adunay sulod nga bugas ug canned goods gipangunahan mismo ni Kuya Gov. Edwin I. Jubahib inubanan sa mga board members sa Distrito Uno nga sila Hon. Nicandro “Nickel” Suaybaguio, Jr., Hon. Prospero “Popo” Estabillo, Jr., Hon. Roger Laguna ug Hon. Francisco "Frank” Remitar, ug representante ni Cong. Pantaleon Alvarez.

Anaa sab sa nasampit nga relief goods distribution ang board member sa Distrito Dos nga si Hon. Franklin Gentiles ug Tagum City Bise Mayor Atty. Eva Lorraine “Lingling” Estabillo kinsa maabtikon nga mingsusi sa kahimtang sa tanang apektadong residente sa Barangay Pagsabangan. Todo suporta sab ang mga personahe sa kapitolyo sa panguna ni Provincial Administrator Engr. Josie Jean Rabanoz.

Mapasalamaton ang mga Punong Barangay ug mga Purok Leaders sa gihimo nga inisyatibo sa Probinsyal nga Panggamhanan ug malaumon sila sa saad ni Kuya Gov nga ipadayon ang mga programa nga adunay tumong masulbad sa dayon ang problema sa pagbaha sa probinsya.

Bisan pa man sa nasinati nga pagbaha karon nga semana, dali lang ang paghubas sa tubig kung itandi sa milabay’ng mga katuigan gumikan sa makanunayong pag-desilt sa mga katubigang bahin sa probinsya ubos sa Oplan Canal Program sa Administrasyong Jubahib.