“DILI kuntento nga modawat lang og isda, hinuon naghimo og pagpangisda” ang People’s Organization (PO) nga Purok 1-B Igangon, San Isidro, KAAGAPAY Farmers Association.

Benepisyaryo ang 18 ka membro sa maong PO nga midawat sa 90 ka free range chicken gikan sa KAwsa sa AGrikulturA ug PAnginabuhian sa barangaY kun KAAGAPAY nga mao ra sab ang nagpalit pagbalik sa gipadagkong manok human sa 45 ka adlaw.

Ang KAAGAPAY mao ang food-sufficiency program ni Gobernador Edwin “Kuya Gob” Jubahib nga gilusad Hunyo 2020 aron mapugngan ang kanihit sa pagkaon gumikan sa COVID-19 pandemic pinaagi’g pagtanom og mga gulay, pagtanom og kahoy ug ang pagbuhi’g manok nga libreng gihatag sa probinsyal nga panggamhanan.

“Ang among halin adto is 29 thousand, dayon gikuhaan man to sa mga kuan sa manok ug feeds; nakalimpyo pod mi og mga 18,000. Ang among 18,000 wala gyod to namo gikuhaan ug among gikasabotan sa membro nga among ikuha og laing project, mao na baboy, duha ka buok. Sa wala pa mi kadawat aning second batch sa manok, among gisabotan upat ka baboy. Unya kay miabot naman ang manok, gitunga na lang namo amoang kwarta, mipalit na lang mi duha ka buok baboy. Ang uban gibilin namo para sa pagkaon sa manok ug baboy,” matod ni Conchita Colita ang Business Manager ug caretaker sa mga hayop.

Apan dili kuntento ang Purok 1-B Igangon ug gibutyag ni Mrs. Conchita nga magdugang sila’g laing project inig kahalin sa manok ingon man sa baboy nga karon usa ug tunga na ka bulan nga motimbang sobra 30 kilos ang matag usa.

“Magdugang mi og laing project para modako. Governor salamat kaayo sa imong gihatag nga daghang project dire sa amoa sa Igangon ug nakatabang gyod sa amoa nga mga pobre. Wala namo gihilabtan ang halin sa manok kay among gipadaghan kay aron puhon og naa mi mga problema naa mi magamit Daghan jud kaayong salamat Gob sa imohang mga project,” pagpasalamat sa grupo kang Kuya Gob pinaagi sa ilahang Business Manager.

Gawas sa paghatag libreng manok, gitudloan sab ang mga benepisyaryo sa maayong paagi sa pagpadako sa mga binuhi.

Libre ang mga semilya ingon man abono ang nadawat sa mga mag-uuma nga gustong mag-gulayan nga ang KAAGAPAY ra gihapon ang mopalit sa ilahang produkto.

Ang programang KAAGAPAY wala nakapadato apan nakatabang na sa mga benepisyaryo sama sa pamilyang Joseph Rizon nga nakapalit og carabao, sa pamilyang Polloso nga nakapalit chainsaw iug motorsiklo gikan sa halin sa KAAGAPAY gulay.

***************///