Si Angelie, ang inahan sa upat ka bata ug kaipon sa usa ka potpot driver, nahatagan na ug intervention gikan sa lokal nga panggamhanan sa Kapalong pinaagi sa Municipal Social Welfare and Development Office (MSWDO) sama sa implanon, usa ka birth control implant. Gitunol sab sa buhatan ang usa ka sakong bugas, mga de-lata, diapers, gatas, mga sanina, ug uban pang nag-una nilang panginahanglanon.

Saysay ni MSWD Officer Dr. Mary Grace Abuda, i-schedule na sab sa ilang buhatan ang paghatag og psychological first aid sa magtiayon gumikan sa ilang sitwasyon.

Aduna na sab ubay-ubay nga tabang ang natunol sa mga tawo nga nibati sa kahimtang sa pamilya. Ang probinsyal nga panggamhanan pinaagi sa PICKMO ug Provincial Social Welfare and Development Office (PSWDO) nitunol sab og food packs ug grocery goods nga makaabag sa pila ka semana nga panginahanglanon sa pamilya.

Sugyot ni Dr. Abuda nga kung mamahimo, ipaagi sa ilang buhatan ang mga tabang nga gusto ihatag sa nasampit nga pamilya kay anaay mga tao nga gisakyan ang panahon aron makapangilad sa uban.

Abli sab ang buhatan sa PICKMO, PTV Davao del Norte ug PSWDO alang sa mga donasyon aron mapaabot ang tabang sa tama nga hingtungdan.