Dunay 86,213 ka mga Dabaonon ang nalibre sa ilang pagpa-ospital sa tulo ka mga provincial hospitals ubos sa Zero-Billing Program ni Governor Edwin “Kuya Gob” I. Jubahib gikan Hulyo 2019 hangtud Disyembre 2021.

Sa tala sa Provincial Social Welfare and Development Office (PSWDO), mokabat ngadto sa P81.5 million ang nagamit nga pondo sa Malasakit Center sa probinsya nga gipunduhan sa Office of the President – Socio-Civic Project Fund.

Ang Davao del Norte Hospital – Kapalong Zone nakahatag serbisyo sa 35,484 ka mga pasyente sa kantidad nga P 35,532,793.94.

Ang Davao del Norte Hospital – Carmen Zone misirbisyo sab sa 23,927 ka mga pasyente nga mokabat ngadto sa P 17,332,268.68.

Samtang ang Davao del Norte Hospital – Islang Garden City of Samal Zone nakaalagad sa 26,802 ka mga pasyente sa kantidad nga P 14,891,435.95.

Apil sa mga hospital bills nga wala na gipabayad sa mga pasyente ang admission, medisina, laboratory, blood chemistry, ug uban pa, sa ilang paggawas sa balay tambalanan. Duna pa jud silay nadawat nga mga tambal sa ilang paggawas sa tulo ka mga provincial hospitals.

Kahinumduman nga ang programang Zero-billing maoy unang opisyal nga gipakanaug nga mando ni Kuya Gob sa iyang paglingkod isip gobernador.

Mikuot pa gani sa iyang sariling bulsa ang gobernador aron ipalit sa tambal, sa dihang nahutda’g tambal ang mga balay tambalanan sa probinsya pagsugod sa iyang termino.

Apil ang mga provincial hospitals sa Davao del Norte sa pipila lamang nga nag-implementar sa Malasakit program sa tibuok Pilipinas.

Sa pagpatuman ni Kuya Gob sa programa, nawad-an og kita ang naasoy nga mga hospital, diin ubos sa pagdumala sa Provincial Economic Enterprise Development Office (PEEDO).

Apan, gipahingusgan sa gobernador nga ang serbisyong panlawas ug medikal alang sa mga Dabaonon angay lamang nga walay presyo ug libreng ihatag sa mga katawhan.

“Ang atong katawhan dunay katungod sa libre nga universal health care nga angay ihatag sa gobyerno,” sulti ni Kuya Gob sa makadaghang higayon.