Sa pagtukod sa pundasyon sa kalamboan nga para sa tanan, gipatuman ni Governor Edwin “Kuya Gob” I. Jubahib ang 1,069 ka infrastructure projects nga nagkantidad og P3.5 billion gikan Hulyo 2019 hangtud Disyembre 2021.
Kini nga mga proyekto milangkob sa mga dalan, tulay, public buildings, water systems, flood control, electrification projects, ug uban pa.
Sulod sa duha ug tunga ka tuig, duna nay 640 ka mga proyekto ang nahuman nga mokabat ngadto sa P1.24 billion, samtang laing 429 ka mga proyekto nga nagkantidad P2.34 billion ang padayon pa.
Apil niini ang gitiwas ni Kuya Gob nga kapin 50 ka mga proyekto nga napasagdan sa nagligad nga administrasyon, nga mokabat ngadto sa P1.5 billion, diin ang uban niini gisugdan pa niadtong tuig 2014.
Wala baleha ni Kuya Gob ang politika sa pagtiwas sa maong mga proyekto, sanglit dili siya mosugot nga masayang ang kwarta sa katawhan, ug buto niya nga magamit kini nga mga proyekto alang sa pag-uswag sa katawhan ug kalambuan sa lalawigan.
Ang programa ni Kuya Gob nga Oplan Canal mi-rehab sa kapin 100,000 linear meters nga canal system ug mipalalum sa mga bukana ug kasapaan aron malikayan ang grabeng pagbaha sa lalawigan.
Kahinumduman nga tungod niini nga programa, sugod sa iyang paglingkod isip gobernador, wala nay natala nga dagkong pagbaha nga sa unang katuigan nakatala ug gatusan ka libo ka pesos nga danyos sa agrikultura, imprastraktura ug mga kabtangan, gawas sa perwisyo nga nahatag niini sa libo-libo ka mga Dabaonon.
Niining bulan sa Enero 2022, nasinati pagbalik ang pagbaha tungod sa shearline ug amihan sa Tagum City, Asuncion ug uban pang lugar, apan dili na pareha kagrabe sa una ug dali na lang muhobas ang tubig.
Dugan pang kapin dosena ka mga access roads ang giablihan sa mga lagyong komunidad sa mga tribu, nga nagpasayon sa paghatud sa mga proyekto ug serbisyo sa mga IPs, gawas nga mas dali na nilang ibaligya ang ilang mga produkto ngadto sa merkado.
Dul-an sab sa 500 ka mga balay sa tribu ang gipatukod sa mga halayo nga mga komunidad sa IPs, diin gipundohan sa National Housing Authority (NHA).
