ARON modaghan, gipahulam una sa Purok 1B-R KAAGAPAY Farmers Association sa Barangay Igangon, San Isidro, Davao del Norte ang gamay’ng halin sa manok uban sa gamay’ng interest ngadto ra sab sa mga membro niini.
Ang KAwsa sa AGrikulturA ug PAnginabuhian sa barangaY (KAAGAPAY) maoy food-sufficiency program ni Gobernador Edwin “Kuya Gob” Jubahib aron masagubang ang kanihit sa pagkaon gumikan sa nasinating COVID-19 pandemic niadtong 2020 ug aron sab madugangan ang kita sa mga Dabaonon pinaagi sa pagtanom og gulay, paghatag og mga free-range chicken nga ilahang padakoon, ingon man ang pagtanom og kahoy.
Ang produkto sa KAAGAPAY membro paliton ra sab pagbalik sa probinsyal nga panggamhanan ni Kuya Gob.
Matod ni Ms. Elma Torbila Pardo, sekretarya sa maong asosasyon, nakalimpyo sila og 8 thousand (pesos) gikan sa halin sa first batch manok nga gihatag gikan sa (KAAGAPAY) nga nagsilbing start-up capital sa “lending.”
“Sa niaging harvest niabot ra gyod 8 thousand ang net kay nangasakit man gud to siya. . Kadtong halin sa among manok amo to siyang gi-palendingan. Nagbilin lang mi’g gamay para makatilaw pod ang tanang members sa among hago. Pero ang katunga pod ato among gisulod sa among lending,” pagbutyag ni Sekretarya Elma.
Nakigtambayayong sab ang Department of Labor and Employment pinaagi sa Tulong Panghanapbuhay sa Ating Disadvantaged / Displaced Workers (TUPAD) program nga naghatag pa-sweldo sa mga KAAGAPAY membro og P3,960 sa ilang napulo ka adlaw nga pagtrabaho.
“Sa first namo nga release sa TUPAD, naa mi gi-allot sa kada membro nga 12 thousand nga among gi-palendingan para nga modaghan. So from the start ato, nagsugod na pod among kwarta nga nag-interest pero gamay lang ang tubo. Ang nanghulam ato ang tanan lang pod nga membro sa KAAGAPAY, ang tanang membro 20, so mao ang first priority nga manghiram sa among kwarta,” padayong pagtug-an ni Elma.
Nagpalabay una og pipila ka semana ang Purok 1B-R Igangon KAAGAPAY una pa sila modawat sa second batch KAAGAPAY manok samtang ang sakit anaa pa sa palibot apan ang ilang “lending” padayong mikita bisan ginagmay. Mapasalamaton gayod kang Kuya Gob ang asosasyon sa programa.
“Nalipay gyod mi kay dako man pod og tabang, makadugang sa amoang panginahanglan. Basta ang manok wala lang gyod siya sakit-sakit, dako jud ang mahalin; kay kadto lang gyod naatlan. ting-sakit, daghang jud ang namatay. . Pero nalipay mi. Kami nagpuli-puli ra pod og lawog, tag-tulo, naay tag-duha maglawog sa manok,” matod sa membro nga si Dionesia Saboda Juan
“Daghan kaayong salamat sa gihatag nga project Kuya Gob Jubahib,” pagpaabot pasalamat sa asosasyon pinaagi ni Sekretarya Elma.
Gumikan kay tinuod nakatabang ang KAAGAPAY, sa 2022 budget adunay gigahin P45 Milyones alang sa maong programa.
*****************///
