NAKAABOT na sa 80.8% ang nabakunahan og first dose samtang 68.8% na sab ang nakadawat og duha ka doses sa angay’ng bakunahan target populasyon nga 744,405 kun 70% sa 1,063,436 sa tibuok Davao del Norte.

Sa 11 ka mga LGUs, nanguna ang lungsod sa Braulio E. Dujali sa 2nd dose nga 81.8% samtang 86.8% na sab sa iyang target bakunahan nga populasyon ang nakadawat first dose.

Ang Tagum City nga mao ang pinakadaghan og populasyon sa tibuok probinsya ang nanguna sa paghatag first dose bakuna sa 88.6% ug 76.1% second dose sa target nga 190,029.

Gawas sa Braulio E. Dujali ug Tagum City, lampas otsenta porsyento na sab sa first dose ang mga LGUs sa Panabo City (85.5%), Sto. Tomas (83.3%) ug Carmen nga 81.2%

Pinaagi sa DavNor Provincial Health Office naningkamot pag-ayo ang administrasyon ni Gobernador Edwin “Kuya Gob” Jubahib nga bisan maka-fully-vaccinated (kaduha nabakunahan) kontra COVID-19 ang 744,405 ka tawo aron maabot ang 70% “herd immunity” sa populasyon nga 1,063,436.

Padayong nanawagan ang PHO sa pagpanguna ni Dr. Alfredo Lacerona nga magpabakuna na kadtong wala pa gyod makadawat sanglit “daghang suplay sa bakuna ang kapilian” ug halos matag adlaw dunay ipahigayon nga vaccination diha sa matag LGU sa Davao del Norte nga naghatag first, second ug bisan booster shots niadtong angayan na modawat niini.

Gawas sa Davao City, ang Davao del Norte ang may pinakataas porsyento nga nabakunahan kung labot sa kampanya nga RESBAKUNA taliwala sa lima ka probinsya sa tibuok Rehiyon XI.

******************///