Nalamdagan ang panghuna-huna sa mga pari ubos sa Diocese of Tagum sa pagpatin-aw ni Governor Edwin “Kuya Gob” Jubahib kabahin sa isyu sa paghawa sa Davao del Norte sa prangkisa sa Northern Davao Electric Cooperative (Nordeco), Inc.
Kauban ni Bishop Medel Aseo ang mga kaparian nga naminaw sa pagpasabot sa gobernador sa mga rason nganong nanguna siya’g petisyon aron ibalhin na sa laing electric utility ang pito ka lugar sa probinsya nga dugay ng nag-antus sa way ayo nga serbisyo sa electric cooperative.
Giisa-isa niya ang dugay nang mulo sa katawhan sa sige’g brown-out, taas nga singil per kilowatt-hour, dako kaayo nga systems losses, kulang kaayo nga supply sa kuryente, dugay nga pagresponde sa reklamo sa konsumante, dakong utang sa Nordeco, ug uban pa.
Gibutyag sab ni Kuya Gob nga duna siya’y ebidensiya sa “pipila ka pamilya nga nagpakasasa, nga mikita, ug walay bayad-bayad sa kuryente nga tagpila ka milyon,” nga ilang gigamit.
Sa pag-endorso sa mga opisyales ug katawhan, nakakuha’g igong suporta ang resolusyon ni Kuya Gob sa Kongreso, hinungdan nga dali lang napasa ang House Bill 10554.
Mihanyag ang maong balaodnon nga ibalhin na sa prangkisa sa Davao Light and Power Company (DLPC) ang Tagum City, Island Garden City of Samal, Asuncion, Kapalong, New Corella, San Isidro, ug Talaingod sa probinsiya sa Davao del Norte, ug Maco sa Davao de Oro.
Gisiguro sa gobernador nga mapasa na sa Senado karong Pebrero ang maong balaodnon, nga ingon niya miagi sa saktong proseso.
Gipanghimakak sab ni Kuya Gob nga gibayaran siya sa Davao Light. Hinuon iyang gibutyag nga ang Daneco ang maoy misulay paghatag kaniya sa usa ka bag nga kwarta, apil ang hanyag nga librehon ang gasto sa kuryente sa iyang balay.
“Sila (Daneco) gani ang nag-offer nga wala nako gidawat. Kay kung gidawat nako ilang offer dili jud ko katindog sa inyong atubangan karon,” butyag ni Kuya Gob sa mga pari.
Gipaniguro sab ni Kuya Gob nga walay trabahante sa Nordeco nga matanggal kung mo-take-over na ang Davao Light, sanglit apil man kini sa probisyon sa balaodnon.
Misulti si Fr. Benjamin Lucena nga natin-awan siya sa maong isyu, dungan sa pag-amin nga dugay na sab nagbagu-od iyang pamilya sa dakong bayranan sa kuryente.
“Sa imong explanation karon Gob, natin-awan ko ba. Sa dugay nga panahon mi nga sige’g reklamo, karon natin-awan na ko. Salamat Kuya Gob,” sulti sa pari.
Dugang sab ni 10th Infantry Division Chaplain LtCol/Rev. Fr. Melchor Torayno nga importante kaayo ang saktong supply sa kuryente alang sa economikanhong kalamboan, nga may dakong kalabotan usab sa national security.
“Based sa national security, very significant kaayo ang source of energy, power supply,” sulti niya. “There will be no economic development without stable source of energy (Walay kalamboan kung walay lig-on nga tinubdan sa sugang daguitabnon).”
