Nakighimamat si Kuya Gob Edwin I. Jubahib ug Kapalong Mayor Ma. Theresa Timbol sa mga datu sa Gupitan, aron malikayan ang kagubot human sa pagpatay kang Barangay Captain Datu Amado Mantayona niadtong Enero 23, 2022.

Gipaniguro sa mga opisyal nga matagaan gayud og hustisya ang gihimong pagpatay sa tinahud ug minahal nga kapitan sa tribal barangay.

Ila sab gipasalig ang padayong pagbubo sa mga proyekto ug serbisyo alang sa kalinaw ug kalamboan sa pinakadakong barangay sa rehiyon.

Misaad sab sila Datu Laris, Datu Onging ug Datu Matol Mansaloon, kauban si Datu Benjamin "Alot" Sugatan, nga motabang pagmintinar sa kalinaw sa maong lugar ug sigurohon nga dili mapahimuslan sa mga NPA ang maong panghitabo, samtang nangita sila sa hustisya.

Ilang gibutyag nga gipugngan nila aron walay mahitabong pagpangayaw, agi'g pagtan-aw og dakong utang kabubut-on sa daghang mga proyekto, serbisyo ug hinabang sa gobyerno sa barangay.

Mapasalamaton sila sa malampusong pagdakop sa suspect ganinang buntag.

Mitunol pud og pahalipay si Kuya Gob sa mga datu, tungod sa ilang padayong pagsuporta sa mga programa sa gobyerno.

Kauban nila sa meeting si Kapalong Chief of Police PMajor Raul Lucas.

 

 

 

 

 

DavNor News

nainggo