Sunod nga tagaan og dakong pagtagad ni Governor Edwin “Kuya Gob” Jubahib ang dugay na pud nga suliran sa limpiyo ug mainum nga tubig sa daghang mga lugar sa lalawigan.

Samtang nanlimbasog siya aron matagaa’g hingpit nga kasulbaran ang serbisyo sa panlawas, dakong pagbaha, problema sa sugang daguitabnon, ug uban pa, gibutyag ni Kuya Gob nga isunod niya pagsulbad ang problema sa tubig, nga kinahanglanon gihapon kaayo sa kalamboan.

“So, gamay na man lang mahuman na man ning problema sa kuryente. Pahibalo nako nga ang sunod, tubig na pud atong solusyonan. Wa koy paki-alam kinsay akong maligsan ani tanan nila,” sulti sa gobernador sa mga kaparian sa Diocese of Tagum.

Daghan pa nga mga lugar sa probinsiya ang way klaro nga source sa tubig, samtang gisaway sab ni Kuya Gob ang dili maayo nga serbisyo sa pipila ka mga water districts sa probinsya.

“Ngano ok ra man sa ilaha nga murag tsokolate, taya-on ang mogawas sa gripo nato,” sulti nya.

Kahinumduman nga sa ika-tulo ka bulan sa iyang paglingkod, gisuroy ni Kuya Gob ang mga bukid sa Talaingod, aron mangita sa posibleng makuhaan sa bulk water supply sa limpiyo ug mainum nga tubig alang sa kalungsuran sa probinsya.

Gibutyag niya nga dunay dakong investor nga andam mamuhunan aron pagtukod sa kasaligan nga water system alang sa tibuok lalawigan.

Nakigpulong kagahapong adlawa si Kuya Gob kang Bishop Medel Aseo ug sa mga pari sa Obispado de Tagum, aron mangayo sa ilang suporta sa iyang kawsa sa pagsulbad sa problema sa kuryente sa lalawigan.

Butyag ni Kuya Gob nga aprubado na sa Kongreso ang House Bill 10554 nga nagpalapad sa franchise area sa Davao Light and Power Company Inc. (DLPC), aron maapil sa serbisyo niini ang Tagum City, Island Garden City of Samal, Asuncion, Kapalong, New Corella, San Isidro ug Talaingod sa Davao del Norte ug sa lungsod sa Maco, Davao de Oro.

Malaumon ang gobernador nga aprobahan kini sa Senado karong Pebrero ug mamahimo na kining hingpit nga balaud kung mapirmahan ni Presidente Rodrigo Dutetre.

Saysay ni Kuya Gob nga gitubag na niya ang panginahanglanong medikal sa kaawhan pinaagi sa Zero-Billing ug padayong pagtukod sa lima ka gagmay’ng hospital sa probinsya.

Iya sab gilusad ang Oplan Canal ug desilting sa mga suba ug bukana aron masulbad ang problema sa pagbaha, samtang gipangunahan niya ang petisyon aron makalingkawas na ang probinsya sa dili maayo nga serbisyo sa Northern Davao Electric Cooperative, Inc. (Nordeco).

“Dili nako ni kaya… mao nga nagkinahanglan jud ko sa inyong suporta. Kay dili man ni pang-personal kundili para man jud ni sa kaayuhan sa katawhan,” hangyo ni Kuya Gob sa mga pari.

 

 

 

 

 

DavNor News

nainggo