GIKALIPAY pag-ayo sa mga residente sa Sitio Libas, San Roque, New Corella, Davao del Norte ang pag-abot sa limpyo nga tubig pinaagi sa Shallow Tube Well (STW) irrigation project nga gitunol sa probinsyal nga panggamhanan ni Gobernador Edwin “Kuya Gob” Jubahib Byernes, Enero 28.
Ang P120,000 kantidad nga proyekto gipondohan sa probinsya pinaagi sa Provincial Agriculture Office (PAGRO) og P100,000 uban ang counterpart sa Libas Pangkabuhayan Farmers Association nga P20,000 aron lang gyod sila makapatubig sa ilang humayan, makahimo og fishpond, makaalima sa pato ug bebe ug ang pinakaimportante, ang limpyong tubig mainom.
“Kadako gyod namong pasalamat, pasalamat jud mi’g dako nga miabot ni sa amoa. . Among gisabotan mag-counterpart ang association, kaning mga tawo dinhi nga nagpalibot, nga mag-counterpart og 20 (thousand) para ma-flowing. Gikaluy-an, nag-flowing na jud siya. Dili lang kay basak ang nakabenepisyo, hasta nang mga balay diha kay naa na sa tungod ang tubig, mainom pa jud. Dako na kaayong grasya, dako na kaayong pasalamat namo nga miabot na ug dili lang gyod na kay kaning mga fishpond, mao na isa. Wala man ni fishpond sa una tungod sa kakulang sa tubig. . Kani dako kaayo nga tabang nga nahatag diria,” pahayag ni Ms. Rodes Edolverio, ang chairwoman sa Libas Pangkabuhayan Farmers Association.
Sanglit padayong nag-agas ang tubig (flowing), matod ni DavNor Provincial Agriculture Department head Joe Andamon nga ang unom ka ektaryas humayan nga gitubigan sa bag-ong shallow tube well irigasyon mahimo pa kining napulo ka beses nga kadak-on kay walay hunong kinin aga-agas 24 oras.
Hinuon nanawagan ang DavNor PAGRO head nga pakusgan gayod ang pagtanom og mga kahoy sa palibot ingong watershed.
“Kani usa ra ni sa mga strategy ni Gob nga masulbad ang kawad-on sa probinsya nga shallow tube well (irrigation). Dako ni siya’g epekto kay dili lang dire ang rain feed; sa tibuok probinsya daghan. . Sa ingon nako tabangan nato pag-rehab ang watershed para continuous ang sufficiency sa tubig,” pagpasiugda ni PAGRO head Andamon uban ang pagpasalig sa daghang planting materials nga kahoy sa iyang opisina.
Gawas sa Sitio Libas Pangkabuhayan Farmers Association sa Barangay San Roque, dungan sab nga gitunol ang lain pa nga STW irigasyon sa Women’s Sunrise Multipurpose Association sa Barangay Sto. Niño, New Corella.
Gitambongan gayod ni DavNor Sangguniang Panlalawigan Board Member Franklin Gentiles ang maong turn-over ingong representante ni Gobernador Jubahib uban sa mga opisyales sa lungsod sa New Corella nga gipangunahan ni Mayor Jorjan Federiso, Vice Mayor Pete Lagumbay ug mga konsehales ingon man ang mga personahe sa DavNor PAGRO ug MAGRO New Corella.
*****************///
