Bisan pa sa pag-abot sa pandemya, mikabat gihapon sa sobra P3.6 bilyones ang kapital nga gibubo sa mga bag-ong negosyo sa probinsya sa Davao del Norte ubos sa administrasyon ni Governor Edwin “Kuya Gob” I. Jubahib.
Sa tala sa Davao del Norte Investment Promotion Center (DNIPC), ang maong kantidad gikatampo sa dul-an 17,000 ka mga bag-ong business registrants sa mga tuig 2020 ug 2021.
Butyag ni DNIPC Chief Joevynar Miedes nga sa tuig 2021, mibalor tanan-tanan sa P1.55 billion ang mga investments nga gibubo sa 7,707 ka mga bag-ong negosyo, diin wa pay labot niini ang report gikan sa Sto. Tomas, San Isidro, Talaingod ug Island Garden City of Samal alang sa mga bulan sa Nobiyembre ug Disiyembre.
Kahinumduman nga sa tuig 2020, duna sab P2.085 billion ang gikatampo sa mga mamuhunan sa 8,365 ka mga bag-ong negosyo ug industriya sa tibuok probinsya.
Wa pa naapil ang kantidad sa mga puhunan ug gidaghanon sa bag-ong pamatigayon sa unang unom ka bulan nga paglingkod ni Kuya Gob sa tuig 2019.
Sa mga dakbayan sa lalawigan, pinakadaghan ang namuhunan sa Tagum City sa tuig 2021, nga mikabat ngadto sa 1,656 ka mga bag-ong negosyo nga mibalor sa P482 million.
Samtang sa mga lungsod, nanguna sab sa gidaghanon ang Sto. Tomas nga dunay 1,120 ka mga bag-ong negosyo sa kantidad nga P121 million.
Apan, nalabwan kini sa balor sa preskong pamuhunan sa Carmen nga mokabat ngadto sa P250.5 million nga gibubo alang sa 619 lang ka mga preskong pamatigayon sa milabay nga tuig.
Nahimong maayo ang performance sa ekonomiya sa probinsiya taliwala sa pandemya tungod sa mga reporma ug programa ni Kuya Gob aron mo-agni sa mas daghang tigpuhunan.
"Investor confidence and dynamic local governance are the keys to economic growth (Ang pagsalig sa mga tigpuhunan ug maabtikon nga local nga pangobyerno ang susi sa paglambo sa ekonomiya)," una nang gisulti ni Kuya Gob.
Gipasalamatan sa gobernador ang dakong tabang sa tanang mga stakeholders, labi na ang mga local government units, mga ahensiya sa gobyerno ug komunidad sa mga negosyante.
Tungud sa paningkamot sa administrasyon ni Kuya Gob sa pagpahimutang sa maayong kahimtang sa ekonomiya, midaog ang Davao del Norte isip Most Business-Friendly (MBF) Local Government Unit sa tuig 2019, samtang nagpabiling Top 10 Finalists sa MBF awards sa 2020 ug 2021.
Tungod niini, mamahimo na nga grandslam awardee ang Davao del Norte isip Most Business-Friendly Province sa tibuok Rehiyon 11, human nga namintinar sa lalawigan ang maong pag-ila sulod sa na lima ka tuig.
Sagunson nga nahimo sab nga Overall 2nd Most Competitive Province ang probinsya sa mga tuig 2020 ug 2021, samtang nagpabilin kini nga Most Competitive Province sa tibuok Mindanao.
