Human ang pila ka tuig nga pag-antos, dako ang kalipay sa mga residente sa Sitio Libas, barangay San Roque, New Corella, Davao del Norte atol sa pormal nga pag turn-over sa Shallow Tube Well (STW) irrigation project gikan sa Probinsyal nga Panggamhanan sa Davao del Norte nga dako og tabang sa pag-angkon nila og limpyo nga tubig.

Kinasing-kasing nga gipaabot sa mga benepisyaryo ang ilang pagpasalamat sa panguna ni Mayor Jorjan “Monet” Federiso ngadto sa administrasyon ni Gobernador Edwin “Kuya Gob” Jubahib sa paghatod og mga programang nipalambo sa munisipyo sa New Corella.

“Isip inahan sa lungsod ako jud ipaabot sa atong pinalanggang governor ang atong dakong pasalamat sa iyang mga programa nga gibubo diri sa lungsod sa New Corella ilabi na jud diri sa Sitio Libas. Dili pud ni siya ma realize nga programa kung wala ang tabang sa atong mga board members… Sa unom kabuok duha ang gihatag diri sa New Corella. Pinangga jud ni Kuya Gob ang New Corella tungod dako ang gugma ni Kuya Gob sa mga mag-uuma dili lang taman sa baba ni Kuya Gob apan lakip na jud sa iyang lihok,” pagsaysay sa Mayor.

Ang maong proyekto nagkantidad og P250,000 nga gipondohan sa probinsya pinaagi sa Provincial Agriculture Office (PAGRO) uban ang counterpart sa Libas Pangkabuhayan Farmers Association nga P20,000.

Gipaabot sab ni Provincial Agriculturist Jose Andamon ang panglantaw ni Kuya Gob nga mo-uswag ang produksyon ug mutaas ang kita sa mga mag-uuma aron mahaw-as sila sa kalisod maong gihatagan gyud og dakong pagtagad kini nga proyekto nga makatabang makapatubig sa ilang humayan, makahimo og fishpond, makaalima sa pato ug ang pinakaimportante, ang limpyong tubig mainom.

“Ang epekto ana, mu-increase ang income sa farmers. Mao mana ang panglantaw ni Gob, mahaw-as ta sa kalisod. Dako dako gyud og posibilidad nga ma target nato na nga panglantaw kay dili lang mu-increase ang production sa homay, nakapa fishpond pa gyud, mag patohan pa gyud, ug uban pang buhaton nga makatabang sa komunidad nato diri. Kining shallow tubewell isa ra ni sa mga strategy ni Gob na para ma solbad ang kawad-on sa probinsya,” dugang sulti ni Provincial Agriculturist Jose Andamon.

Gawas sa Sitio Libas Pangkabuhayan Farmers Association sa Barangay San Roque, dungan sab nga gitunol ang lain pa nga STW irigasyon sa Women’s Sunrise Multipurpose Association sa Barangay Sto. Niño, New Corella.

DavNor News

nainggo