MIABOT na sa 9,745 ka mga benepisyaryo sa KAwsa sa AGrikulturA ug PAnginabuhian sa barangaY (KAAGAPAY) ang natabangan sa TUPAD program sa Department of Labor and Employment, Byernes, Pebrero 4, 2022 ug hangtod ning pagsulat nagpadayon pa ang payout.

Halos P40 Milyones na nga pondo sa ‘TUPAD’ o Tulong Panghanapbuhay sa Ating Disadvantaged/Displaced Workers ang “nasungkit” ni Gobernador Edwin “Kuya Gob” Jubahib gikan sa DOLE aron matabangan ilabina ang mga marginal Dabaonon nga naapektohan pag-ayo sa COVID-19 pandemya sukad pa niadtong Marso 2020.

Ang TUPAD naghatag og emergency employment alang sa mga nawad-ag trabaho sa minimum P396 matag adlaw nga pagtrabaho sulod sa napulo ka adlaw. Nahimong prayoridad nga mga TUPAD trabahante ang mga benepisyaryo sa KAAGAPAY nga gikan sa marginal sector.

Ang KAAGAPAY maoy food-sufficiency program ni Gobernador Jubahib pinaagi’g pagtanom og gulay, pagbuhi’g manok ingon man ang pagtanom og mga kahoy aron masagubang ang kawad-on gumikan sa kapit-os dala sa pandemya.

Ang tanang semilya ug ang mga piso nga padakoon sa mga benepisyaryo maoy libreng ihatag sa probinsya nga mao ra sab ang mopalit og balik sa nahimong produktong gulay ug manok sa KAAGAPAY benepisyaryo.

Sa paghimo’g kulongan sa manok, ang matag benepisyaryo mahimong makadawat P396 matag adlaw’ng pa-sweldo sa TUPAD gawas na lamang niadtong mga benepisyaryo sa ubang programa sa gobyerno sama sa 4Ps.

Ang mga KAAGAPAY benepisyaryo giporma nga mahimong legal People’s Organizations (PO) aron sab sila makadawat pa og laing mga hinabang sa gobyerno gawas sa TUPAD program sa DOLE.

Sa kasamtangan, miabot na og 94 DOLE rehistradong POs gawas sa 127 POs bag-ohay lang nahatod sa maong opisina ug lain nga 766 aplikanteng POs ang kasamtangan gi-proseso sa DavNor Cooperative Investment Development Division (PADO-CIDD).

********************///

 

 

 

DavNor News

nainggo