Bisan pa man sa nasinati nga pagbaha sa pipila ka bahin sa probinsya sa miaging bulan, kinasing-kasing nga gipadayon sa Probinsyal na Panggamhan sa Davao del Norte ang pagpang-apod-apod sa mga hinabang nga nagkantidad og P3 million sa probinsya sa Bohol gikan Enero 31 hangtud Pebrero 5, 2022.

Gipadala ni Governor Edwin "Kuya Gob" I. Jubahib ang pipila ka mga personahe gikan sa nagkalain-laing opisina sa Kapitolyo sa Davao del Norte aron itunol ang mga food packs, nga dunay sulod nga bugas ug canned goods, alang sa mga LGUs sa Bohol ug didto sa Bohol Provincial Cultural Center, nga gihimong receiving area sa tanang moabot nga ayuda sa probinsya.

Ang DavNor Team gipangunahan ni Assistant Provincial Social Welfare and Development Officer Jeffrey Calamongay, kauban sila PSWDO Public Service Officer III Panfilo Pamugas ug Admin Officer IV Melvin Roy Javier sa Provincial Disaster Risk Reduction and Management Division (PDRRMD) ug uban pa.

Sumala ni Bohol Provincial Administrator Atty. Kathyrin Pioquinto, daghan gihapon ang mga lugar nga walay kuryente ug signal human gikuso-kuso ni Bagyong Odette ang probinsya niadtong Disyembre.

“We are actually on week 6 after the landfall of typhoon Odette and so far we are now slowly recovering, nabalik na ang kuryente sa uban nga mga lungsod. However, this is still temporary, emergency supply ni under the two power supplies here in Bohol, wala pajud mi naka konekta sa grid sa Leyte mao nang ang amoa gyu’ng total supply dinhi sa kuryente is only 33 megawatt,” sulti ni Pioquinto, kinsa mao sab ang Executive Director sa Barug Bohol Operations.

Sa kasamtangan, dakong prioridad sa maong probinsya ang makahatag limpyong supply sa tubig sa mga residente.

“Si Governor Art has been calling on donations for gensets especially for the provision sa atong mga water pumping stations kay importante jud ang tubig. So, bisan walay suga basta naay tubig, so didto namo ipaabot ang mga dagko nga mga gensets,” dugang ni Pioquinto.

Sa ulahing datus sa Barug Bohol Provincial Operations Center, mikabat na sa 204,602 ka balayan ang nadeklarang totally damaged ug 84,032 ang partially damaged.

Samtang adunay 115 ka tao ang gideklarang patay ug 10 ang missing.

Malipayon nga mipahayag sa iyang dakong pasalamat si Bohol Governor Art Yap pinaagi sa iyang Facebook post.

“Our heartfelt gratitude to the Provincial Government of Davao del Norte thru the leadership of Governor Edwin I. Jubahib for sending his team of five provincial govt. employees to personally deliver P3 million-worth of food packs to their pre-identified LGU recipients in Bohol. Your act of giving is a shining example of Mother Teresa's statement, "This is the meaning of true love, to give until it hurts." During this time of calamity in your province, you still managed to help Bohol. We will not forget. We will be forever grateful. Daghan jamong salamat! God bless you more!” ingon ni Governor Yap sa iyang facebook post.

Sa pagkakaron gapadayon gihapon sa pagdawat ug bisan unsa nga klase sa hinabang ang probinsya sa Bohol, ug sa mga buot motunol sa ilang tabang, mamahimong makig coordinate sa Provincial Government of Bohol o direkta nga moadto sa Barug Bohol Operations Center nga anaa nahimutang sa Provincial Capitol sa nasangpit nga probinsya.

 

 

 

 

 

 

 

DavNor News

nainggo