Mikabat og 9,998 ka food packs ang napang-apod-apod sa Probinsyal nga Panggamhanan sa Davao del Norte alang sa mga naapektuhan sa pagbaha nga miigo sa Asuncion, Carmen, ug Tagum City.

Sumala ni Assistant Provincial Social Welfare and Development Officer Jeffrey Calamongay nga hangtod Enero 21, 2022, adunay 28,552 ka apektadong mga pamilya ug indibidwal sa tibuok probinsya ang natunolan og mga food packs nga adunay sulod nga bugas ug canned goods.

Sa Lungsod sa Asuncion, gipangunahan mismo ni Governor Edwin "Kuya Gob" I. Jubahib ang pagpanghatag sa 2,590 ka food packs, uban sa opisina ni 1st District Representative Hon. Pantaleon Alvarez, nga mitunol usab og 1,730 ka food packs.

Sa Distrito 2, mihatag ang Probinsyal nga Panggamhanan sa Davao del Norte og 1,376 ka food packs sa mga barangay sa Mabaos ug Guadalupe sa Lungsod sa Carmen.

Miabot sa 432 ka food packs ang gihatag sa probinsya, samtang 1,470 ka food packs ang gihatag sa opisina ni Congressman Alvarez alang sa mga naapektuhan sa pagbaha sa siyudad sa Tagum.

Midugang usab og hatag og 2,400 ka food packs ang Jinyi Import & Export Trading Corporation alang sa mga apektadong residente sa Barangay San Miguel, Tagum City.

Gipasalig ni Provincial Disaster Risk Reduction Management Division Planning and Early Warning Section Head Eric Rosillo nga kung makasinati man ta usab og pag-ulan, pagbaha, o bisan unsang katalagman, andam ang PDRRMD nga muhatag og saktong serbisyo sa katawhan bahin sa pahimangno ug sayo nga pasidaan.

“Kana ang magarantiya nato – nga Davao del Norte has its own localized forecasting, based on our existing state-of-the-art equipment”, matud ni Rosillo.

Gibutyag sab ni PDRRMD Head Glenda Delideli nga padayon ang mga plano sa probinsya nga pauswagon ang rescue equipment sa matag LGU aron mas mapalig-on ang pagpangandam batok sa kalamidad.

 

 

 

 

 

DavNor News

nainggo