Tungod sa maabtikong early warning ug disaster responses services sa Probinsyal nga Panggamhanan sa Davao del Norte ubos sa administrasyon ni Governor Edwin “Kuya Gob” I. Jubahib, nahimong paspas ang pagsabwag sa impormasyon ug pagtunol og tabang alang sa mga naapektuhan sa nahitabong pagbaha sa Davao del Norte kaniadtong Enero.

Gigarantiya ni Eric Rosillo, ang head sa Planning and Early Warning Section (PEWS) sa Provincial Disaster Risk Reduction Management Division (PDRRMD) nga mahatdan og sayo ug saktong impormasyon ang mga Local Government Units (LGUs) sa Davao del Norte aron makapangandam sa mga umaabot nga katalagman, pinaagi sa anaa nga state-of-the-art equipment sa probinsya.

"As of now, naa tay mga state-of-the-art monitoring and warning equipment. So, bisan pa og layo kaayo ang mga rivers, at the tip of our fingers, pwede nato sila ma-monitor real-time didto... Even now, naa na’y Automated Weather Stations kada LGU. So, kini nga mga weather stations, maka-forecast ni sa kung unsa ang mga posibleng mahitabo in every LGU”, saysay ni Rosillo.

Dugang pa sa PEWS Head nga dili lang kini limitado sa pag-forecast og posibleng pagbaha, apan apil usab ang mga linog, tsunami, ug uban pang klaseng kalamidad.

Gibutyag sab ni PDRRMD Head Glenda Delideli ang mga inisyatibo nga ginahimo sa probinsya batok sa mga katalagman.

“Magbaha man o dili, dapat equipped ang atong opisina... Bisan pa nga naa ta’y mga responders in every barangay and municipality, dapat i-enhance ilang rescue equipment and gears”, ingon ni Delideli.

Gani karong tuiga, adunay ginaprepara ang probinsyal nga panggamhanan nga dugang pang mga rescue vehicles isip pagpangandam sa posibleng muabot nga mga kalamidad sa probinsya.

 

 

 

 

DavNor News