STO NIÑO, NEW CORELLA, DavNor— Tukoron ang usa ka gatos desente nga balay para sa tribong Dibabawon ug kini na ang ika-600 ka balay nga gihimo ilawom sa paningkamot sa administrasyon ni Gobernador Edwin “Kuya Gob” Jubahib para sa mga Indigenous People (IP) sa probinsya.

Sa pakig-alayon sa National Housing Authority ug ubang nasyonal nga mga ahensya, gatosan milyones nga pondo ang nasungkit ni Kuya Gob para sa pabalay sa mga IPs nga sa daghang katuigan “nakalimtan.”

“Sa Talaingod naa ta’y 300 houses; 100 houses sa Kapalong ug naa pod ta’y 100 houses sa Asuncion ug ika-600 houses ni dinhi sa New Corella. Kini pasabot lang nga ang atong gobyerno karon naka-focus para paghatag og tabang or intervention para suporta sa atong mga kaigsoonang IP nga atong nakita nga lisod kaayo ang ilahang panimalay. Ug sayod ta nga sila mismo maglisod pagpatukod sama niining desenteng panimalay. . Mao ni ang atong paningkamot nga ang taga-Davao del Norte walay mapasagdan, no one left behind,” matod ni Kuya Gob nga naghatag sa iyang mensahe atol sa maulan (rainy) nga groundbreaking Pebrero 9.

Sama sa ubang IP community nga natukoran na, dili lang kutob sa pabalay ang paningkamot sa administrasyon ni Gobernador Jubahib. Ang mga trainings gipahigayon aron ang mga IPs makabarog sa ilang paningkamot sama sa “banana chips making” sa tribong Dibabawon.

“Dili lang taman sa panimalay. After ani maghimo ta’g livelihood program; gi-training namo naa na’y livelihood ninyo kadtong banana chips; kinahanglan inyo ning suportahan, then mananom mo para duna mo’y pirmeng income ug ato pod isuporta ang KAAGAPAY program para sa inyong sustainable livelihood program,” dugang mensahe sa gobernador.

Ang KAAGAPAY kun KAwsa sa AGrikulturA ug PAnginabuhian sa barangaY maoy flagship program ni Gobernador Jubahib alang sa food-sufficiency sa tibuok probinsya nga nag-awhag pagtanom og mga gulay ingon man pagbuhi’g manok nga gihatag libre sa administrasyon. Ang produkto paliton ra sab pagbalik kung gusto sa mag-uuma.

Mihangyo sab si Kuya Gob sa suporta alang sa kalinaw ug kahusay.

“Gikinahanglan lang nato nga i-maintain ang peace and order. Unang-una natong hangyo sa mga IPs nga kinahanglan dili mo magpadala sa mga recruitments sama sa NPA kay kana siya usa ka dakong babag sa kalamboan sa atong pangandoy para sa pamilyang IPs. Ug inyong kampanyahan ang ubang kaigsoonan, inyong kaparyentehan nga padayon pa nga naa sa pikas nga pang-gobyerno. Kinahanglan magkahiusa tang tanan para sa kahusay ug kalinaw para ang development nga atong gipangandoy paspas nato ma-deliver,” pasibaw-hangyo sa gobernador ilabina ngadto sa mga IP lideres.

Sa Davao del Norte dunay pito ka tribo nga gilangkoban sa Ata- Manobo, Dibabawon, Kalagan, Mandaya, Mangguangan, Mansaka ug Sama, diin ang pinakadakong grupo nga Ata-Manobo anaa nagpuyo sa kabukiran sa Talaingod ug Kapalong.

*******************///

Ang DavNor counterpart naglakip sa site preparation sa proyekto nga pabalay alang sa tribong Dibabawon 

Kauban ang mga opisyales sa NHA ug sa probinsya alang sa capsule laying 

Kuya Gob uban ni NHA Regional Manager Engr Clemente Dayot 

One DavNor, One Team alang sa malipayong mga opisyales sa probinsya 

Kauban sa mga sakop sa tribong Dibabawon 

Ang DavNor Engineering team kauban si Assistant PA Engr. Hazel Zafra 

Malipayong tribo 

Fist-bump uban sa tribong Dibabawon 

 

DavNor News