Gitutokan karon ni Governor Edwin “Kuya Gob” I. Jubahib ang programang panlawas alang sa komunidad pinaagi sa paglig-on sa barangay health centers.
Gipanghingosgan ni Kuya Gob nga kinahanglang lig-onon ang mga barangay health centers aron siguradong mahatdan og sakto nga serbisyo sa panlawas ang tanang Dabaonon, atol sa gipahigayong blessing ug turn-over ceremony sa bag-ong natukod nga barangay health center sa Magugpo South, Tagum City, nga mikantidad og P1,550,000.00 kaniadtong Pebrero 9, 2022.
“Kinahanglan i-empower nato ang atong mga barangay health centers, ug pabutangan pud nato’g working facilities. So, sa kana nga paagi, ang panginahanglan sa katawhan dili lisod… Kining maong health center dili lang ni taman sa atong blessing karon. Kung dili, butangan ta ni ug nurse, kinahanglan adunay duty nga midwife, butangan ug working nga facilities, para mamahimong complete ang serbisyo...” saysay pa ni Kuya Gob.
Kahinumdoman nga gipahimuan na ni Kuya Gob og gagmay nga ospital ang mga lungsod sa New Corella, Asuncion, Talaingod, Sto. Tomas ug sa siyudad sa Panabo aron matubag ang medikal nga panginahanglanon sa katawhan.
“Tungod kay naa tay gobyernong ospital, naa tay tulo ka district hospitals, pero layo ang serbisyo para sa katawhan… Unya nakita nako na dili pa igo ang paghatag og libreng hospitalization ug libreng tambal sa atong tulo ka district hospitals. Tungod kay aduna pay nakita nato nga layo ang atong mga kaigsoonan nga naa sa mga lungsod”, ingon ni Kuya Gob.
Gawas sa maong barangay health center, gi-inagurahan usab sa gobernador ang pagkonkreto sa dalan sa Visayan Village– Purok Rafael-Purok Exodus, nga mikantidad sab og P39,561,926.67.
Gipasalamatan ni Barangay Captain Alfredo R. Pagdilao ang probinsyal nga panggamhanan ug ang lokal nga panggamhanan sa ilang pangandoy nga makatukod og bag-ong health center.
“First and foremost, thank you very much sa provincial government, through the initiative of Governor Kuya Edwin Jubahib… for realizing our dream. Actually, dugay naman namo ni nga dream because ang among health center nga isa, naa lang gyud sa stage sa barangay – sa gym. So karon, magamit na gyud ni siya para sa katawhan sa atoang barangay, of course panahon sa kinahanglanon nila, naa na’y mu-serbisyo ug gwapo na ang atoang building", sulti sa kapitan.
Dugang sab ni Barangay Health Worker Loriebeth Dayag nga dakong tabang ang proyekto alang sa kalamboan sa barangay, labi na bahin sa panlawas sa mga lumulupyo.
“Dako kaayo ning tabang karon... Tungod sa mga serbisyo nga manginahanglan sa among mga kapurokan po, duol ra sila sa ilang pag-anhi... ang among serbisyo dili na mi maglisod sa paghatag sa among katawhan kay tungod maayo na ang among health center ug... duol na lang siya sa... mga lumulupyo diri na dapit po”, sulti ni Dayag.
Kauban sab sa okasyon sila 2nd District Board Member Franklin Gentiles, Tagum City Mayor Allan Rellon, ug uban pang mga opisyales sa lokal nga panggamhanan ug sa barangay.
