Mokabat ngadto sa 322 metriko tonelada tanan-tanan ang mga hinabang nga gitunol sa Probinsya sa Davao del Norte ngadto sa mga lugar sa Caraga ug Visayas, nga naigo sa pagkusokuso ni Bagyong Odette niadtong Disyembre.

Miabot sa P15 million ang kantidad sa mga relief goods nga gihatud sa probinsya ngadto sa Surigao City ug isla sa Siargao sa Region XIII, ug sa mga lalawigan sa Cebu ug Bohol sa Visayas.

Unang natagaan ang Surigao City ug Siargao niadtong katapusan sa tuig 2021, samtang ulahing nahatdan og 34,770 ka mga food packs ang mga isla sa Cebu ug Bohol sa pagtapos sa bulan sa Enero.

Kini tungod kay kinahanglan pa nga unahon sa probinsiya sa Davao del Norte ang paghatag sa mga hinabang alang mismo sa katawhan niini nga nabahaan sa mga lungsod sa Kapalong, Asuncion, New Corella, Carmen ug Tagum City niadtong Enero 16 ug 17 ning Bag-ong Tuig.

Mismo si Cebu Governor Gwendolyn Garcia ang nag-welcome sa One DavNor Team, nga gipangunahan ni Provincial Social Welfare and Development Officer Rosalinda Rapista, kauban si Provincial Disaster Risk Reduction Management Division Chief Glenda Delideli.

Mapasalamaton sab si Mayor Kristine Vanessa Chiong sa Naga City, Cebu, nga nakadawat og 10,000 ka food packs.

“Pakisulti kay Governor Jubahib ang among kinasing-kasing nga pasalamat sa tabang gikan sa Davao del Norte,” sulti sa Mayor.

Nagpasalamat sab si Bohol Governor Art Yap sa hinabang nga gihatud sa Team DavNor, nga gipanguluhan ni Assistant Provincial Social Welfare and Development Officer Jeffrey Calamongay.

“Our heartfelt gratitude to the Provincial Government of Davao del Norte… We will not forget. We will be forever grateful. Daghan kaajong salamat! God bless you more!,” ingon ni Yap.

Kahinumduman nga pagkahuman sa bagyo, gilusad dayon ni Governor Edwin “Kuya Gob” I. Jubahib ang kampanya alang sa relief assistance sa mga biktima ni Bagyong Odette, nga nag-uluhan, “Kinasingkasing nga Tabang Gikan sa Katawhan sa Davao del Norte.”

Miamot ang tanang mga empleyado ug opisina sa Kapitolyo, inubanan sa tabang gikan sa nagkalainlaing sektor, apil ang tabang sa Bureau of Fire Protection, kasundaluhan sa Eastern Mindanao Command (Eastmincom), ug uban pa.

 

 

 

 

 

DavNor News

nainggo