Dako ang pasalamat sa usa ka pamilyang benepisaryo sa Balik Probinsya, Bagong Pag-asa Program (BP2P) kay nabag-o ang ilang kinabuhi sa daghang panalangin nga gihatag kanila sa gobyerno aron pagsugod og bag-ong kinabuhi.
Wala damha ni Charilyn Gamol nga makita niya ang mas hayag nga kaugmaon alang sa iyang pamilya diha sa ilang pagkuyog sa iyang bana nga si Nathaniel pagpauli sa San Nicolas, Panabo City, Davao del Norte.
“Laking pasasalamat po talaga namin sa oportunidad na natanggap na dati sa Maynila parang pangarap lang. Pero, pagdating dito totoo na pala na may kabuhayan na ibibigay. Yon, masaya na po kami dito,” sulti ni Charilyn.
Kauban sa pamilyang Gamol ang uban pang lima ka mga pamilya, diin gilangkoban sa 19 ka mga indibidwal, ang miabot sa probinsya niadtong Marso 19, 2021 gikan sa kauluhang Manila sa tabang sa BP2 program.
Kuyog ang nagkalainlaing ahensiya sa gobyerno, ang Probinsya sa Davao del Norte ang usa sa dunay pinakamalampuson nga pag-implementar sa BP2 program, sa pipila ka mga lalawigan sa nasud nga nahimong pilot area sa maong programa.
Nagpait ang pamilyang Gamol pagkahawa ni Nathaniel sa trabaho isip bus driver tungod sa lock down sa dihang misaka ang kaso sa Covid-19 sa Manila sa tuig 2020, mao nga gisuwayan nila pag-apply sa programang PB2.
“Di namin inaasahan na magkaroon dito ng hanapbuhay at bahay... Nabago po ang buhay namin sa mga tulong na natanggap naming. Dahil sa Maynila walang-wala kami at mahirap ang buhay doon,” sulti ni Charilyn.
Apil sa hinabang ang food, financial, shelter, livelihood assistance ug uban pa, gikan sa nagkalainlaing ahensiya sa gobyerno.
Apil niini ang P54,000 nga Transitory Shelter Assistance gikan sa Department of Social Welfare and Development (DSWD), nga ilang gipatukod og balay sa yuta nga ilang napalit sa iya-an ni Nathaniel.
Ang P36,000 nga livelihood assistance nga gihatag sa Department of Labor and Employment (DOLE) ilang gipatukod og tindahan, nga mokita na karon og kapin P24,000 kada bulan.
Gawas sa gihatag kanila ni Governor Edwin “Kuya Gov” Jubahib nga konsumo sulod sa tulo ka bulan, nakadawat sab sila og mga semilya sa gulay, 50 ka mga manok ug unom ka kanding gikan sa DavNor KAAGAPAY program, sa tabang sa Department of Agriculture (DA).
Mihatag sab ang National Housing Authority (NHA) og tulo ka android tablets aron magamit sa ilang mga anak sa ilang pag-eskwela.
Nakadawat sab sila og training sa meat processing gikan sa City Government sa Panabo, nga ilang nagamit paghimo’g chorizo ug lumpia nga apil karon sa ilang mga baligya.
Nanumpa si Charilyn nga ilang ampingan ug palamboon ang tabang nga gihatag kanila sa gobyerno.
”Yung mga tulong na bigay ng gobyerno ay palalaguin namin at tsaka iingatan,” paniguro niya.
Tungod sa kalipay nasinati nilang kaharuhay, mi-awhag siya sa mga buot mo-uli sa ilang tagsa ka probinsya sa pagpahimulos sa BP2 program.
“Inaanyayan ko yung mga nagnanais na umuwi ng probinsya nila na mag-avail na po kayo dito sa BP2 program dahil dito may tunay na pag-asa,” ingon niya. “Yung kilala ko si Laisa Francisco, gusto niya mag-apply. Sabi ko, ‘sige mag-apply ka upang kagaya ko marami ka ring matatanggap’.”
