KATORSE na sab ka indibiduwal ang nahatagan og “ikaduhang” tsansa nga magkinabuhing gawasnon human nga nakatapos sa daghang bulan nga pagbansay sa Katawhan Kontra Droga sa Komunidad (KKDK) diha sa DavNor Balay Silangan.

Gikan sa District 1 ang 14 nga gradweyts nga mipailawom sa plea bargaining agreement gumikan sa ilang salaod sa illegal nga droga.

Matod ni gradweyt Inday Sagulo nga nakakat-on gyod siya og daghang leksyon sa pila ka tuig nga pagkapreso ug mapasalamaton kaayo sa tabang sa lain-laing ahensya sa gobyerno ilabina sa administrasyon ni Gobernador Edwin “Kuya Gov” Jubahib nga naghimo og Balay Silangan Reformation Center alang kanila.

“Ang akong experience sa sulod nakahatag nakog leksyon kanang malayo sa pamilya; malayo sa akong mga anak. Lisod kaayo kay makita nako pagbisita nila, namayat sila, apektado jud kaayo sila, nagsigeg hilak kay wala sila maanad nga wala ko sa ilang tapad, sa ilang kiliran. Didto na-realize nako nga lisod jud nga mahiwalay ko sa akong mga anak,” pagtug-an ni Inday nga taga Mesaoy, New Corella.

Kauban sa daghang national agencies, gipaabot sa probinsyal nga panggamhanan ang lain-laing livelihood trainings ug ubang suporta sa ilang pagbangon.

“Dako kaayo akong kalipay nga naay tabang mga livelihood at saka daghang ko’g natun-an; mga suportar nila nga akong goal gyod atagaan og katumanan ang mga opportunity nga gihatag sa akoa--ang pagbag-o nako kauban ang akong mga anak. Ang pagbag-o sa kaugalingon nga biyaan na gyod ang tanang bisyo nga makadaot . . Salamat kaayo. Dako kaayog pasalamat nga ing-ani nahatagan og higayon pareha namo nga nakasala, natagaag higayon nga magbag-o,” pasalamat ni Inday uban ang luha.

Si gradweyt Romnick Salazar todo-pasalamat sa tanang tabang.

“In behalf sa among mga kaubanan gusto lang namo ipaabot ang among pagpasalamat ug paghatag pagtagad kanamong biktima sa ginadili nga droga, sa paggahin og oras namong mga biktima, . Dili sayon ang makulong. Dili sayon ang mag-celebrate og pasko, New Year, birthdays sulod sa presohan sulod sa tulo ka tuig. Mga panahon nga mo-graduate imong anak, pero dili nimo makita, picture na lang. Salamat sa gobyerno nga naghatag og plea bargaining, sa Department of Justice, daghang salamat. Daghang salamat sa second chance sa amoa. Dili lalim sa nagdumala ang ing-ani nga programa. Lisod sa mga nagdumala kay kami mga badlongon usahay. Kay Governor Jubahib, sir salamat kaayo, sa Operations Center sa KKDK program, sa tanan-tanan salamat,” matod ni Romnick.

Panghinaut sa pagbag-o sa maayong kinabuhi ang mensahe ni Kuya Gov pinaagi ni Executive Assistant Anselmo Junio.

“Isip graduates gihagit mo ni Kuya Gov Edwin Jubahib nga matawo ta pag-usab. Kadtong mga daotang nahimo, daotang desisyon nga nahimo kaniadto dili na nato balikan. Molingi lang ta sa atong kagahapon pero dili ta mobalik. Mopadulong ta sa unahan kay naa didto ang tinuod nga kagawasan, ang kagawasan nga maghimo og usa ka maayong butang alang sa kaugalingon ug alang sa tibuok katilingban,” matod ni Exec Asst Junio nga naghisgot sa pagtabang pinaagi sa KAAGAPAY food sufficiency program ni Kuya Gov.

Nagtinabangay gayod ang mga departamento sa DavNor PGO, PAdO, PDRRMD, EWDD, PEEDO, LPRRC, PHO, PENRO, PAGRO, PICKMO, PBO,PEO, PGSO, PSWDO ug nasyonal ahensya PDEA, DOJ, DOH, PNP, PAO, DOLE, DTI, TESDA ug DILG nga mogradweyt ang second batch 14 ka indibiduwal gawas pa sa 25 migradwar sa first batch..

******************///

Mga gradweyts sa KKDK 

Gradweyts photo ops uban sa mga personahe luyo sa KKDK nga programa 

DavNor PSWDO head Ms. Rosalinda Rapista 

"Certificate" nga gradweyt na 

 

DavNor News

nainggo