Sa ika-limang higayon, nadepensahan sa lalawigan sa Davao del Norte ang trono niini isip pinakalabaw nga competitive nga probinsiya sa tibuok Davao Region.

Gitunol sa Regional Competitiveness Committee (RCC), kauban ang Department of Trade and Industry ang 1st Overall Most Competitive Province Award sa tuig 2021 sa Davao del Norte, atol sa gipahigayon nga awarding ceremony kagahapong adlawa, Pebrero 22, 2022.

Sukad pa sa tuig 2017, sunod-sunod nga nakuha sa probinsiya ang pinakataas nga award tungod sa pinakalabaw nga grado niini sa aspeto sa dinamikong ekonomiya, episiyenteng panggobyerno, imprastraktura ug kalig-on.

Ang padayong pagdaghan sa pamuhunan ug kalig-on sa ekonomiya niini taliwala sa pandemya ang nahimong basehan aron makuha sa probinsya ang pinakataas nga score sa Cities and Municipalities Competitiveness Index 2021 sa rehiyon.

Sa tuig 2021, kapin sa P1.55 billion ang mga investments nga gibubo sa sobra 7,707 ka mga bag-ong negosyo sa lalawigan.

Tungod niining maayong performance sa Davao del Norte, una nang nasakmit sa probinsiya ang pasidungog isip ika-duhang labing maayo o Overall 2nd Most Competitive Province sa tibo-uk nasud sa Pilipinas sa tuig 2021, nga una niining nakuha sa milabay nga tuig 2020.

Gipahinungod ni Governor Edwin “Kuya Gov” I. Jubahib sa katawhang Dabaonon kining dugang kalampusan sa probinsya ilawom sa iyang liderato, samtang iyang giila ang dakong kontribusyon sa mga local government units (LGUs), sa private sector ug sa tanang mga stakeholders.

“It is… with deep gratitude that I dedicate this award to the hardworking Dabaonon people (Akong ginapahinungod kining award sa mga kugihang katawhang Dabaonon),” sulti sa gobernador sa iyang mensahe, nga gibasa ni Local Economic and Investment and Promotion Officer Joevynar Miedes.

Mapasalamaton si Kuya Gov sa gipakitang dakong kumpiyansa sa mga tigpamuhunan sa probinsya, diin mitala na og P3.6-billion ang mga preskong investments, nga gitampo sa dul-an 17,000 ka mga bag-ong business registrants gikan sa iyang paglingkod sa Hulyo 2019.

Kahinumduman nga sa paningkamot sa gobernador, unang nadawat sa Davao del Norte ang pasidungog isip Most Business-Friendly (MBF) Province sa nasud sa tuig 2019, samtang nagpabilin kining Top 10 MBF Finalist sa mga tuig 2020 ug 2021.

Sa maong okasyon, nasakmit sab sa Tagum City ang 1st Overall Most Competitive Component City Award, samtang sunod sab nga nakuha sa Panabo City ang 2nd Overall Most Competitive Component City Award.

#MostCompetitiveProvince
#OneDavNorOneTeam
#KuyaGob