Gihatagan og pagtagad ni Governor Edwin “Kuya Gov” I. Jubahib ang mga panginahanglanon sa sektor sa relihiyon pinaagi sa pagpaminaw ug pagresolba sa mga mulo sa clergy, religious sisters, pastors, ug Muslim Imams ug Ustads sa Davao del Norte atol sa consultative meeting nga gipasiugda kaniadtong Pebrero 15-16, 2022.

Nagkadaiyang mga mulo sama sa pagpataas sa honorarium, pagpalig-on sa modyular nga sistema sa pagtuon, ug pagpatukod og eksklusibong opisina alang sa mga eskwelahan sa Madrasa ang gipaabot sa mga partisipante gikan sa sektor sa relihiyon.

Usa sa unang gipasalig ni Kuya Gov ang paghatag og alokasyon sa badyet alang sa modyular nga sistema sa mga Madrasa.

“Sige, kanang sa modular, kaya na nako na matubag, di pa mahuman ang eleksyon… i-submit na lang ninyo tanan para nga mahatagan namo’g allocation sa budget. Kung maglisod mo’g kuha’g budget sa province, personal nakong budget akong ihatag ana,” ingon ni Kuya Gov.

Gisiguro sab sa gobernador nga mahatagan na og eksklusibong opisina ang mga magtutudlo sa Madrasa sa Davao del Norte.

“About ana, naa naman ta’y bag-ong building sa Sangguniang Panlalawigan. So, ang kaning owned building sa Sangguniang Panlalawigan… so i-occupy ni sa uban nga office. So kato pung mahawaan, pwede na. So kana, guaranteed na na nga mahatagan mo og Muslim exclusive office,” matud ni Kuya Gov.

Gawas niini, mipahayag sab ang gobernador nga paningkamotan nila nga makabutang og badyet para sa honorarium increase alang sa mga Ustads sa mga eskwelahan sa Madrasa.

Matud ni Governor Jubahib, importante nga magkahiusa ang gobyerno ug ang relihiyosong sektor sa pagtabang og pagpalambo sa komunidad ug sa kinabuhi sa katawhan.

“Ang religious [sector] ug ang gobyerno, isa ra man ta. Ang akoa kung giserbisyohan nako ang katawhan, ang religious giserbisyohan sad ninyo ang katawhan… So, ako wala ko nag-stand ana nga naa’y division between the state and the religious. Ang akoa, kinahanglan kuyog ta. So, kung naa ma’y request ang religious sa’koa, kaya nako pangitaa’g paagi… Sa akong administrasyon… gusto nako nga magkuyog ta para sa maayong development sa Davao del Norte,” sulti ni Kuya Gov.

Dako ang kalipay ug pasalamat sa tibuok Muslim community tungod sa mga proyekto, imprastraktura, ug mga programa nga gidalit sa probinsyal nga panggamhanan sa Davao del Norte.

“Ang tanang development services sa katawhan miabot gyud from provincial level down to municipal down to barangay level; and at the same time, down to grassroot. So niabot gyud sa katawhan. KAAGAPAY, educational services, health services, very satisfied mi kay naa na gyud niabot,” saysay ni Panabo City Arabic Teachers Association President Ustad Rey Macla.

Gipaabot sab ni Imam Ronaldo "Anwar" Casinto, presidente sa Tagum City Federation of Imam ang iyang pasalamat sa suporta nga gihatag sa probinsya sa sektor sa ka-musliman.

Samtang, mapasalamaton sab ang ubang partisipante sa sektor sa relihiyon nga gikan sa nagkadaiyang simbahan sa Davao del Norte sa mga natabang sa probinsyal nga panggamhanan ilabi na kadtong may kalabotan sa relihiyon.

“Mi-appreciate mi sa mga butang nga nahimo nimo Kuya Gov… bisan gani ang mga projects nga imo man gyung gipasaligan. .. income-generating projects nimo sa mga kabos… labi na kining sa COVID… ang mga facilities, labi na ang mga resources, murag naa na halos didto tanan… Sa tanang mga nahimo nimo Gov, di gyud namo na kalimtan,” ingon ni Most. Rev. Medel S. Aseo, obispo sa siyudad sa Tagum.

Matud pa ni Pastor Jimmy Mantuag gikan sa Word of God Fellowship Talaingod, dako gyud ang natabang sa lokal nga panggamhanan sa Davao del Norte pinaagi sa mga programa ug serbisyo nga ilang gihatag sa mga katawhan sa lungsod.

“Hilabi na sa- diha sa Talaingod, dako kaayo iyang gikatabang diha sa amoa. So, nanghinaot mi nga mupadayon pa gyud ang programa ni Governor… Tungod kay kami mga lumad man, dako kaayo ang among kalipay nga nahatagan og mga kalsada ang mga kabukiran labi na diha sa side sa Talaingod,” butyag sa pastor.

Sa maong panagtigom, mipadangat sab si Kuya Gov og mensahe ug mipresentar sa mga proyekto nga nahimo sa probinsya sama sa mga proyekto sa imprastraktura, programa sa KAAGAPAY, zero-billing hospitalization, ug uban pa.

Writer: Gwyn Kelly O. Lobitos

#OneDavNorOneTeam

#DavaodelNorte

 

 

 

 

 

DavNor News

nainggo