Malampusong gipahigayon sa Department of Labor and Employment (DOLE) Regional Office XI ang Launching of Livelihood Start-Up Project niadtong Pebrero 24, 2022 sa siyudad sa Tagum.

Namugna ang programa nga dunay temang: “Umpisang Pagbangon, Proyektong Pangkabuhayan ang Tugon,” sa tinguhang matapok ang nagkalain-laing industriya—tripartite councils, non-government organizations, mga pribado ug pang-publikong institusyon sa edukasyon aron sa paghiusa sa nagkadaiyang ideya mahitungod sa malungtarong panginabuhian alang sa pag-uswag sa estado sa kinabuhi sa katawhan sa Rehiyon-XI.

Sumala ni Atty. Randolf C. Pensoy, ang OIC Regional Director sa DOLE, nanghinaot sila nga mapaduol sa katawhan ang nagkalain-laing oportunidad sa panginabuhian tungod buot nilang makatabang sa ilang pinansyal nga mga panginahanglanon. Dugang pa ni Atty. Jason Balais, ang DOLE-XI Assistant Regional Director, gikinahanglan sab nila ang dugang kahibalo sa mga partisipante tungod,

“…DOLE is running out of ideas… We have no monopoly of ideas so we engage with others’ ideas; that’s why we formalized this project.”

Sa sugyot ni TSSD Paul V. Cruz, ang Livelihood Start-Up Project gihimong usa ka kompetisyon sa nagkadaiyang business project proposals nga mahimong salmutan sa tanang miyembro sa industriyang Tripartite Council; tanang State/Private Universities ug mga Kolehiyo; ug Corporate Foundations sa Rehiyon sa Davao. Naghatag sab sila og sumbanan sa mga gilaumang partisipante sa kompetisyon.

Nanawagan si DOLE National Chief Ma. Lourdes Gonzales sa mga interesadong organisasyon sa nasangpit nga mga industriya nga dili sayangan ang higayon nga mahimong kabahin sa proyekto sanglit usa kini ka inisyatibo aron makabangon gikan sa pagkunhod sa ekonomiya tungod sa pandemya.

Ideklara ang mga mananaog karong umaabot nga Mayo 1, 2022 atol sa kasaulogan sa National Labor Day.

Ang Departamento sa Labor and Employment (DOLE) nanghinaot nga makatabang sa pagsulbad sa problema sa kapobrehon sa komunidad sa susamang paagi niining proyekto aron ang tanan makakab-ot nianang kinabuhing hapsay ug hamugaway.

 

 

 

 

 

DavNor News