Nagtinabangay ang lain-laing opisina sa Probinsyal nga Panggamhanan sa Davao del Norte ubos sa administrasyon ni Governor Edwin "Kuya Gov" I. Jubahib sa pagserbisyo sa katawhan pinaagi sa Oplan TApok sa Barangay Alang sa Nanginahanglan ug Galisod (Oplan TABANG).

Nagkadaiyang health and social services ang padayong gidalit sa mga opisina sa probinsya alang sa katawhan sa dihang gilugway ang Oplan TABANG sa Tagum sugod Miyerkules, Marso 2, sa Tagum National Trade School—Apokon human sa upat (4) ka adlaw nga pagserbisyo niini sa Island Garden City of Samal (IGaCoS) sa milabayng semana.

Pipila ka serbisyong panlawas ang gitanyag sa Provincial Health Office (PHO) sama sa dental services diin libre ang oral examination ug pagpaibot og ngipon, minor surgeries sama sa tuli, X-ray examination services, COVID-19 vaccination, medical consultation, ug pagpanghatag og libreng tambal.

Bag-o sab nga gidugang sa PHO ang eye care services nga nagatanyag og libreng konsultasyon sa mata ug nagahatag og libreng antipara ilabi na ngadto sa mga nag-edad og 40 anyos pataas.

Libreng gupit, tsinelas, ug mga assistive devices sama sa baston, saklay, ug wheelchair ang gipangtunol sa Provincial Social Welfare and Development Office (PSWDO) ngadto sa mga taong nanginahanglan niini.

Isip pakigtambayayong sa PSWDO, mitabang sab ang non-governmental organization nga UNited Leaders ADvocators of Davao del Norte (UNLAD) Kabataan pinaagi sa pagpanghatag og libreng lugaw sa mga mitambong sa Oplan TABANG.

Adunay gitanyag ang Provincial Veterinary Office (PVO) nga veterinary medicines sama sa multivitamins ug antibiotics, anti-rabies vaccine, libreng check-up, ug Artificial Insemination (AI) alang sa mga kahayopan.

Nanghatag sab ang Provincial Environment and Natural Resources Office (PENRO) og mga semilya sa Rambutan ug Trichanthera.

Samtang mga liso ug binhi sa gulay ug prutas, abono, biopesticides, ug Trichonderma ang gipanghatag sa Provincial Agriculture Office (PAGRO).

Midalit sab ang Provincial Legal Office (PLO) og libreng legal services sama sa pagnotaryo og Affidavit of Loss, Affidavit of Legitimation, Affidavit of Correction, ug uban pang klaseng legal nga mga dokumento.

Mapasalamaton ang mga residente sa Tagum City sa libre ug mas gipaduol nga mga serbisyong gidalit sa nagkadaiyang sektor ug opisina sa probinsya.

"Pasalamat mi sa DavNor sa among nakuha nga Oplan TABANG… Sa eye care… para sa among mata… wala mi ikapalit, so karon naa ma'y libre, hayahay na kaayo. Makabasa na gyud mi ani karon," sulti ni Mary Ann Rojas, taga Barangay Apokon, Tagum City nga nagpakonsulta sa iyang mata ug nakadawat ug libreng antipara.

Mipahayag sab sa iyang pasalamat si Olivia Bertanico gikan sa Barangay Magugpo West, Tagum City human nakapahimulos iyang anak sa Operation Tuli.

"Salamat kaayo sa libre nga serbisyo… mas sayon na lang karon kay duol na, kumpleto tanang serbisyo, ug libre lang tanan… dako gyud ni nga tabang sa amoa… mao nga salamat kaayo," ingon ni Bertanico.

Nagpadayon karong adlawa ang paghatag og serbisyo sa dakbayan sa Tagum, samtang sunod nga adtoan ugma sa Oplan TABANG Caravan ang siyudad sa Panabo.

Writer: Gwyn Kelly O. Lobitos

#OneDavNorOneTeam
#OplanTabang
#ResbakunaPlus
#DavaodelNorte

 

 

 

 

 

 

 

 

 

DavNor News

nainggo