Gawas sa mensahe sa pasalamat alang sa katawhan sa Talaingod, gibusog ang mga mata sa mga ningtambong sa 2nd State of the Town Address ni Mayor Onit Libayao pinaagi sa video presentation nga nagpakita sa dakong agi sa administrasyon kabahin sa kalamboan sa lungsod.

Matud ni Mayor Onit, pinasahi ang SOTA karon nga tuig kay gipakita sa iyang administrasyon nga manag-uban ang kapaspas sa kalamboan ug teknolohiya nga mao ang tatak sa iyang pagdumala. Apan ginaniguro sa mayor nga bisan pa man sa kalamboang nasinati, padayon kini sa pagpreserba sa kultura sa inilang IP Municipality sa probinsya.

Ang SOTA nga gipahitabo niadtong Marso 23 sa New Public Market and Terminal ang pinakauna sa kasaysayan sa lungsod kung diin gipakita live sa TV ug Social Media pinaagi sa PTV Davao del Norte, Love Net Cable, ug One DavNor Network ug PTV 48 Facebook pages. Buot ni Mayor Onit nga makita sa tanan nga ang Talaingod nakigsabayan sa ubang lokal nga panggamhanan sa pagpahimulos sa teknolohiya aron mas daling makab-ot ang gitinguhang kalamboan.

Sa nasampit nga video presentation, gitagaan og gibug-aton sa administrasyon ang mga programa sa peace and order, turismo, health and social services, cultural enrichment and preservation, education, livelihood opportunities, strong partnership sa nagkadaiyang stakeholders ug ang dakong tabang sa nasyonal nga gobyerno ug probinsyal nga panggamhanan ubos sa liderato ni Governor Edwin “Kuya Gov” I. Jubahib.

Gipasidunggan sab ang mga opisina ug mga partners sa LGU Talaingod pinaagi sa paghatag kanila og plaque of recognition. Ug isip gasa sa mga nanambong, nagpahigayon ang organizing team sa panguna ni Municipal Administrator Clifford Libayao og salu-salo ug social night aron mas mahimong halandumon ang maong panagtigum.

Writer: Mervin Jay Z. Suaybaguio

 

 

 

 

 

DavNor News