Wala pay alas-otso sa buntag, nagcut-off na ang pagpalista para sa libreng dental services sa dihang sayo kaayo gidagsa sa mga tao ang Oplan TABANG sa Lungsod sa Sto. Tomas niadtong Martes, Marso 22.
Mas midaghan karon ang naserbisyohan sa Oplan TABANG diin padayon ang pagtanyag og lain-laing health and social services sama sa dental, eye care, x-ray, libreng konsultasyon, serbisyo legal, libreng tuli, libreng gupit, pagpanghatag og mga semilya ug abono, veterinary medicines, ug assistive devices.
Gani, dili lang mga residente sa Sto. Tomas ang mipila sayo sa buntag kondili aduna usay mga dayo gikan sa kasikbit nga mga lungsod sama sa Carmen ug Tagum, nanghinaot nga makaapas pa sa mga libreng serbisyo nga hatod sa Probinsya.
Luyo sa pagkadismaya sa ubang mga residente nga naapsan og cut-off, hingpit nga mapasalamaton ang katawhan sa Sto. Tomas nga natabangan gayud sa kalidad ug libre nga mga serbisyong gitanyag sa Oplan TABANG.
“Nagpasalamat kami diria sa Sto. Tomas National High School sa pag-adto sa Province of Davao del Norte para sa Oplan TABANG 2022. Daghan kaayo’g na-avail like for example sa dental, sa Oplan Tuli, ug daghan pa kaayo mga gipang-avail na natabangan jud kaayo ang kadaghanan”, sulti ni Evon Mae Agujetas, usa ka magtutudlo sa Sto. Tomas National High School.
Mipahayag sab sa iyang pasalamat si Leah V. Tobias nga taga Barangay La Libertad, Sto. Tomas na nakadawat og crutches gikan sa Provincial Social Welfare and Development Office (PSWDO) para sa iyang bana nga si “Reynaldo”.
“Kini kay para sa akong bana nga si Reynaldo Tobias, diabetic pud, naputol iyahang tiil tungod sa [pagka] diabetic… Naay nagpahiram sa’moa, kahoy. Naay nakatambag sa’moa nga naa daw’y Oplan TABANG diri, mao tong niadto ko… Pasalamat ko kay Governor Jubahib ug sa PSWDO nga nihatag samo’g crutches. Dako kaayo ni’g ikatabang kay makabalik na pud siya’g lakaw, makalakaw-lakaw mi, makalihok-lihok mi sa iyang panginahanglan kay… magsige mi’g check up ba, maglisod mi kay bug-atan siya atong kahoy, dili pa gyud amoa. Hiniraman ra”, saysay ni Tobias.
Samtang si Virginia D. Cañizares nga taga Barangay Tibal-og, Sto. Tomas, wala kapugngi nga ma-emosyonal sa pagpasalamat sa sungkod nga libreng gihatag sab kaniya sa PSWDO isip tabang.
“Dako kaayo akong pasalamat sa cane nga ilang gitabang tungod kay ang akoang tungkod guba na gyud… Ang status nako karon gout arthritis tapos may cyst pud sa akoang tuhod nga nagatuyok so lisod kaayo akong paglakaw… Kaning akoang karaan nga tungkod, hinatag pud ni sa akoang kumare tapos guba na siya diri mao na sige ko’g ka-slide. Mao na nga naningkamot jud ko na makapangayo ko’g bag-ong tungkod tungod kay wala man ko’y kwarta nga ikapalit kay pobre ra man gyud mi kaayo… Kaning akoang gipangandoy nga tungkod, murag dako jud kaayo ni’g ikatabang nga dili nako ma-umod ug makatabang gyud ni sa pang adlaw-adlaw nako nga paglakaw-lakaw”, pasalamat ni Cañizares.
Ang maong kalihokan gitambongan usab ni Sto. Tomas Municipal Mayor Ernesto T. Evangelista ug Tibal-og Barangay Captain Ricky C. Inodio-an nga misuporta ug personal nga gipasalamatan ang Probinsyal nga Panggamhanan sa Davao del Norte sa panguna ni Governor Edwin "Kuya Gov" I. Jubahib alang sa pagpaduol sa libreng serbisyo ngadto sa mga Tomasino.
Writer: Gwyn Kelly O. Lobitos
