ANG TABANG bisan kung gamay “dako” alang sa nanginahanglan.

Kini ang apresasyon sa tigtanom og gulay magsilingang Loida Riñola ug Josephine Bravo sa paghatod sa Oplan TApok sa Barangay Alang sa Nanginahanglan ug Galisod o’ Oplan TABANG sa lungsod sa Braulio E. Dujali Huwebes, Marso 17.

Gawas sa programang KAAGAPAY, ang Oplan TABANG gihatod ni Gobernador Edwin “Kuya Gov” Jubahib diha gayod sa tugkaran sa barangay aron dili na makagasto’g dako ang mga lumulupyo.

“Among nadawat kani, ang dental unta unya kay nag-close naman. . . Dako gyod kaayo’g tabang sa akoa kay sukad nag-pandemya hangtod karon dili gyod mi makapamalit og semilya,” matod ni Loida Riñola ug Josephine Bravo nga nagpakita sa nadawat nga mga liso, seedlings ingon man abono gikan sa DavNor Provincial Agriculture Office (PAGRO).

Matod ni Loida nga sa ilang nadawat sa Oplan TABANG sama sa duha ka kilo nga abono dako na kaayo ang mahimo niini sa ilang matag adlaw’ng pagkinabuhi.

“Gikinahanglan pod ni namo kay kung dili abonohan dili kaayo mamunga ang gulay. . Kung sobra pod amo ibaligya ba, unya mapalit namo ginamos, kape, asin, asukar. . .Dako kaayo (tabang), labi kay hilig pod mi’g gulay. Sa tawo kung tapolan jud siya, wala gyod,” padayong pahayag ni Loida nga gisegundahan ni Josephine nga unta magpadayon ang paghatag libreng semilya aron walay bugto ang ilang pagtanom og gulay.

“Dili nami maghasol og pangita asa mi mangayo parehas una. Nalipay nakakuha ko (paliya). . . Talong, raddish, pechay, paliya, pepino kay mao gyod na among lingaw sa kada adlaw.”

“Bisag unsang gulayon basta mapakinabangan namo. Dako kaayong tabang sa amoa ang gulay.”

Si Josie Espartero nga taga Purok 5 Bugtong Talisay mipahayag nga ang Oplan TABANG tinuod gyod nakatabang sa iyang pamilya.

“Sobra pa kaayo. Akong apo nagpatuli, naka-avail gyod mi. Nakakaon pa mi’g lugaw ganina, salamat gyod kaayo. Tsinelas, medical check-up. . Salamat gyod sa nagdumala ani. Naa pod mi diay calendar, gitagaan mi.”

Pinakadaghang serbisyo alang sa panglawas ang hatod sa Oplan TABANG. Bisan pa niana, ang ubang departamento sa DavNor Kapitolyo sama sa Provincial Veterinary Office (PVO) nagpaduol sab sa ilang opisina aron maserbisyohan ang mga hayop.

“Vaccine sa iring ug iro. . . Kini nga mga services nga libre ra kaayo makatabang jud sa among mga hayop nga layo sa rabies, makalikay pod, dili kaayo makuan ang iyang mapaak. . wa ta kabalo kinsa ilang mapaakan,” matod ni Kyla Biton nga taga Purok 3 Poblacion nga nakadawat bitamina og tambal pang-purga sa iro ug iring.

“Ako magpasalamat gyod ko kay Sir Jubahib kay nindot kaayo nga pribilehiyo. Example sa dental, mahal kaayo ang ibot sa ngipon karon. . Dili tanan maka-afford. Salamat ko sa iyahang mga proyekto sama ani, daghang siya’g matabangan. . Ako magpaibot ngipon, nagkuha ko’g semilya,” todo-pasalamat sab ni Rowelyn Mugas nga taga Poblacion, Dujali sa iyang nadawat.

 

 

 

DavNor News

nainggo