Sukad sa pagdasdas sa pandemyang Covid-19 sa Davao del Norte niadtong tuig 2020, walay kahumanan ang pas-anon sa katawhan ilabina sa aspetong pinansiyal maong dako'g kontribusyon ang mga programang gi-establisar sa probinsyal nga panggamhanan sama sa Oplan Tabang nga masulbad ang kalisod sa mga Dabaonon.

Sa panguna ni Gobernador Edwin “Kuya Gov” Jubahib kauban ang suporta ug One Davnor, One TeamWORK sa mga departamento sa Kapitolyo, gipaabot ang mga serbisyo sama sa Medical ug Dental consultation, Covid-19 vaccination, libreng gupit, libreng tambal, libreng eyeglasses, libreng tuli, libreng tsinelas, libreng tambag legal, libreng veterinary services, ug pagpang apod-apod og libreng semilya sa prutas ug gulay nga nakatabang aron mamenusan ang pinansiyal nga kalisdanan sa katawhan.

Imbes nga mugasto pagpakonsulta sa ospital, pagpalit og tambal, pagpatuli o pagpa-ibot og ngipon, makatipid na ang mga Dabaonon tungod libre na kining maong mga serbisyo atol sa Oplan Tabang.

Gipaabot ni Joan Tibog Boboy, inahan sa batang gituli sa Oplan Tabang, ang iyang sentimento ug pagpasalamat sa natagamtaman nga libreng serbisyo kay wala na siya nakagasto og dako tungod gipaduol na g’yud kini sa ilahang dapit.

“Ni adto ko diri karon aron sa pagpatuli sa akong bata tungod kay libre lang diri sa Oplan Tabang. Dako kaayo ni siya og tabang sa amoa kay libre isa pa duol ra sa amoang barangay unya sa kawad-on karon sa pinansiyal paadto sa ubos, wala tay kwarta may diri kay duol ra. Ang x-ray mahal mahal pud baya unya karon duol ra, nianhi g’yud sila diri. Dako kay ko’g pasalamat sa naghatag aning Oplan Tabang sila sa Davnor sila Kuya Jubahib ug [Congressman] Alvarez ug sa tanan nilang kaubanan ug sa One Davnor,” sulti ni Joan.

Dugang pa ni Marinel Pedere, senior citizen, nagsilbi ang Oplan Tabang nga yabi sa kagawasan gikan sa kalisod tungod naghatag kini og sistematikong solusyon pinaagi sa pagdala og mga libreng serbisyo sa Dabaonon aron dili na mag sige’g paggawas og kwarta kay dili tanan adunay igong badyet ikagasto.

“Akong gi avail na serbisyo kay minor operation ug check-up. Opportunity na man gud ni nga maka avail mi kay dili na ta kaayo makagasto naa ra pud diri duol sa among barangay so kini dako na g’yud kaayo na tabang diri sa amo sa Sonlon. Dako jud ni siya’g tabang kay daghan ang natabangan kay katong uban nga wala g’yud sila’y budget nakita nila nga libre ra ang serbisyo na gi-render sa Oplan Tabang,” pagsaysay niya.

Mipadayag sab si Marinel sa iyang pagpasalamat sa Probinsyal nga Panggamhanan sa Davao del Norte.

“Sa Davao del Norte nagpasalamat ko sa inyong gihatag nga tabang diri sa Sonlon kay dako g’yud siya’g kahimuan diri sa mga katawhan nga nanginahanglan ug dali ra siya maduolan. Dili lang diri sa Sonlon apan sa tanang nagkinahanglan,” pagtapos ni Marinel.

 

 

 

 

 

 

 

 

 

DavNor News

nainggo