Subay sa pagsaulog sa 2022 National Women's Month nga adunay temang “WE Make CHANGE Work for WOMEN: Agenda ng Kababaihan Tungo sa Kaunlaran”, giila sa Department of Social Welfare and Development (DSWD) Region XI kauban ang Men Opposed to Violence Everywhere (MOVE) Davao del Norte Chapter ang aktibong kontribusyon sa tanang kababayen-an, ilabi na sa probinsya.

Sa usa ka special episode sa Kasamtangang Katikaran sa Kalambuan (KKK) kaniadtong Martes, Marso 8, 2022, gipasiugdahan sa DSWD-XI ug MOVE-DavNor Chapter, inubanan sa suporta sa Probinsyal nga Panggamhanan, ang "Kantahan Alay sa Kababaihan" diin mitanyag ang DSWD DavNor Band og mga awit para sa mga babaye isip pasidungog.

Matud ni Social Welfare and Development Officer and Provincial Team Leader Candelaria C. Tingson, gipasiugda ang maong kalihokan isip pag-ila ug pagpasalamat alang sa tanang kontribusyon sa kababayen-an sa kalamboan sa katilingban.

“Tungod niini, ang MOVE Davao del Norte nagpasidungog sa kontribusyon sa mga kababayen-an pinaagi niining mabulukong Kantahan Alay sa Kababaihan, a tribute to the women on its contribution of the development… Dugang kaalam, pagpahibalo, pagtuki, ug kabahin diha sa pagpatuman sa nagkadaiyang programa ug serbisyo alang sa kalamboan. Ang padayon niining pagpaningkamot para sa panaghiusa ug kalampusan alang sa kaugalingon, sa pamilya, sa komunidad, ug sa tibuok nasod,” sulti ni Tingson.

Gipasabot ni MOVE Davao del Norte Chapter Chairperson Daniel B. Tutor ang tumong sa ilang organisasyon isip support group sa mga kababayen-an ug iya sab gipasalig nga ang mga kalalakin-an kauban nila sa pag-angkon sa patas, luwas, ug hapsay nga komunidad alang sa tanan.

“Ang Men Opposed to Violence Everywhere (MOVE) Davao del Norte nakigduyog sa maong kasaulogan sa National Women’s Month 2022 isip usa ka organisasyon sa mga kalalakin-an nga adunay tumong sa paghatag og aktibong partisipasyon sa pagprotektar sa kababayen-an nga may prinsipyo, matinud-anon, ug katambayayong sa pagpaundang sa tanang klase sa pagpangabuso sa mga kababayen-an,” ingon ni Tutor.

Gi-awhag sab sa MOVE-DavNor Chairperson ang mga tigpamati nga suportahan ang adbokasiya bahin sa gender equality, women’s right, ug access to opportunities alang sa tanan, ilabi na gayud sa mga babaye.

“Mubarog ta para paghatag og gahom ug katakos sa mga kababayen-an. Ang paghatag og gahom or pag-empower sa mga kababayen-an makapahimo kanila nga masaligon ug makahuluganong makiglambingit sa angay nga mga institusyon aron masiguro nga sila makahatag ug makabenipisyo gikan sa kalamboan ug pagbag-o”, pagdasig ni Tutor.

Midugang sab og sulti ang Center Head sa Angel’s Haven ug Regional Chairperson sa DSWD-XI MOVE, Edgar B. Requilme, nga tumong nila ang pagpanas sa mga kapintas batok sa kababayen-an ug kabatan-onan.

“Isip pangulo sa Men Opposed to Violence Everywhere sa DSWD-XI, among adbokasiya ug amoang pagsuporta sa efforts sa atoang gobyerno to eradicate gender-based violence and to end violence against women and children”, matod ni Requilme.

Gipaabot ni OIC Regional Director for Operations and DSWD-GAD TWG Region XI Chairperson Elizabeth T. Degorio ang iyang pasalamat sa mga opisyal ug miyembro sa MOVE-DavNor Chapter sa mga kalihokan niini para sa mga kababayen-an.

“Daghan kaayong salamat sa inyong mga kasikas, alang sa mga kababayen-an dili lang sa Davao del Norte kondili sa tibuok nasod sa Pilipinas. Kini atong ipadayon nga mga kalihokan ilabi na ang inyong paghatag og mga serbisyo didto sa atong mga GIDA [Geographically Isolated and Disadvantaged Areas] areas. Daghan kaayong salamat sa inyohang tanan sa inyong mga kasing-kasing nga humok kaayo para sa atong mga kaubanan nga nagkinahanglan gyud kaayo,” pasalamat ni Degorio.

Isip katapusang pamulong, mihatag si MOVE Davao del Norte Chapter Secretary Viel John W. Apog og makapadasig nga mensahe alang sa tanang kababayen-an sa probinsya sa Davao del Norte.

“The world will never be as beautiful as it is right now without women. Dili mahimong ingon ani ka nindot ang atong kalibutan kung wala ang mga babaye. Dili lang sila basta basta nga babae, ang mga babae gyud sila. Wala kita kung wala sila... Let me leave this quote to all the women out there—You are never inferior. You are never weaker than men. In fact, you possess the most precious ability, and that is the ability to love and nurture the people around you,” panapos ni Apog.

Gawas sa serye sa mga mensahe nga gihatag sa mga mamumulong ug sa LIVE jamming session uban ang DSWD DavNor band, aduna sab gipahigayon nga raffle draw sa maong programa diin nanghatag og mga grocery goods ug cellphone load.

Writer: Gwyn Kelly O. Lobitos