Isip lakip sa KUYA GOB Developmental Agenda ni Governor Edwin “Kuya Gov” I. Jubahib ang ‘knowledge management, education, and sports’, gisiguro sa Probinsyal nga Panggamhanan sa Davao del Norte nga maila ang tanang nagdala og garbo sa probinsya sa natad sa isports ug edukasyon.
Subay niini, gipasidunggan sa Sangguniang Panlalawigan (SP) ug sa Probinsyal nga Panggamhanan sa Davao del Norte si Elias G. Tabac nga midaog isip kampeon sa World’s Highest Obstacle Course Race (OCR) ug si Brenyl Doning Abilla kinsa niranggo og numero uno sa Criminologist Licensure Examination pinaagi sa paghatag og framed resolution kaniadtong Pebrero 28, 2022 sa SP Session Hall, Legislative Building, Capitol.
Gihatag kay Elias G. Tabac ang framed resolution sa Resolution No. 1204 nga nagaila sa kadaugan niini isip KAMPEON sa World’s Highest Obstacle Course Race nga gipahigayon sa crater sa Mount Kilimanjaro sa Tanzania, East Africa kaniadtong Septiyembre 20, 2021.
Human gipildi ang 42 ka elite racers gikan sa 26 ka lainlaing nasod sama sa Australia, Denmark, Brazil, Russia, New Zealand, Switzerland, United Kingdom, United Arab Emirates (UAE) ug United States of America (USA), gibuntog ni Tabac ang World’s Highest OCR ug siya gideklarar nga pinakaunang gold medalist sa men's division.
Gidawat ni Provincial Sports and Youth Development Office (PSYDO) Head Giovanni I. Gulanes ang gihatag sa probinsya nga framed resolution, isip representante ni Tabac, nga kasamtangang tua sa Baguio City agig pagpangandam sa lahi na sab nga international obstacle race nga gikatakda niyang sangkaon sa Nevada, USA.
Mapasalamaton si Tabac dili lamang sa pasidungog nga nadawat niini, apan ilabi na sa makanunayong suporta nga gihatag sa probinsyal nga panggamhanan gikan sa iyang training period hangtod sa aktuwal niya nga kompetisyon.
“Dako ko’g pasalamat sa akong achievement sa World’s Highest OCR sa Tanzania 2021. Dako ko’g pasalamat sa among governor Kuya Gov Edwin I. Jubahib na kuya ng masa, sa among administrator… Engineer Jean Rabanoz, ug sa among sports coordinator Giovanni I. Gulanes, daghan kaayong salamat sir sa suporta ug tibuok Davao del Norte, daghan kaayong salamat sa inyong suporta—sa makanunayong suporta sa akoa,” pasalamat ni Tabac.
Sa laing bahin, malipayon sab nga gidawat ni Brenyl Doning Abilla ang iyang framed resolution sa Resolution No. 109, nagaila sa iyang kalampusan isip TOP ONE (1) sa tibuok nasud nga adunay rating na 90.75% atol sa December 2021 Criminologist Licensure Examination nga gidumala sa Professional Regulation Commission (PRC) ug sa Board of Criminology.
Nakuha ni Abilla, 23-anyos, taga Barangay Magugpo North, Tagum City, ug usa ka alumnus sa University of Mindanao (UM) Tagum College ang kinatas-ang pwesto taliwala sa 11,610 nga nakapasar gikan sa 33,983 ka mga examinees nga mikuha sa maong licensure examination.
Dili masukod ang kalipay ni Abilla sa maong kadaugan ug kini iyang gipahinungod sa inahan nga usa ka homemaker ug sa amahan nga nagtrabaho isip welder, nga mao ang nagsilbi niyang inspirasyon.
“Pagkita nako sa result… is super happy ko then pati akong pamilya at least napa-happy nako sila… At least makatabang na gyud ko sa ilaha karon,” sulti ni Abilla.
Aron masuportahan ang iyang mga panginahanglanon sa kolehiyo, gikinahanglang isakripisyo ni Abilla ang uban niyang mga klase para manarbaho isip food stall attendant sa gawas sa eskwelahan.
Gani, bisan pa human siya migradwar sa kolehiyo kaniadtong 2019, gikinahanglan sab niyang modangop sa pag-apply isip call center agent ug warehouse worker samtang naghulat sa eskedyul sa board exam.
"2 years nga nagbasa-basa, then September 2021 is didto ra ko nagfocus na gyud kaayo nga 12-14 hours ko nagabasa everyday… Siguro karon nabayran ang mga kahago ug sacrifices po,” butyag ni Abilla.
Luyo sa mga hagit nga nasugatan ni Abilla, naangkon niya ang kinatas-ang puwesto sa nationwide board examination, nagpamatuod dili lamang sa iyang lapad nga kahibalo kondili usab sa iyang pagkamalahutayon ug kakugi.
Si Tabac ug Abilla, kinsa parehong nakatampo sa paghatag og garbo ug dungog sa probinsya, maoy tinuod nga tinubdan sa inspirasyon sa mga kabatan-onang Dabaonon ug maoy mga testimonya nga ang Davao del Norte nagpatunghag dekalidad nga training grounds sa isports ug edukasyon.
Writer: Gwyn Kelly O. Lobitos
