HUMAN sa isa ka bulan nga paglibot-libot sa serbisyong RESBAKUNA diha sa Oplan TABANG, ipadayon sa DavNor Provincial Health Office ang pagbakuna sa mga hamtong, 12-17 anyos nga kabataan lakip na ang 5-11 anyos ang edad diha sa sulod sa DavNor Sports Complex matag Huwebes ug Byernes nga magsugod karong Abril 7.

Sa gihapon ang ‘Pfizer’ mao ang i-bakuna sa mga kabataaan samtang ang mga hamtong mahimong makapili sa available bakuna. Ang DavNor PHO team mohatag kun kini man first dose, second dose, booster dose, 5-11 ug 12-17 menor-de-edad nga mga bata.

Gusto gayod ni Gobernador Edwin “Kuya Gov” Jubahib nga maabot na ang herd immunity aron paspas na sab ang pagtuyok sa ekonomiya.

Alang sa mga menor-de-edad nga kabataan gikinahanglan ang presensya sa ilang ginikanan o kaha ang guardian dala ang mga birth certificate o baptismal certificate. Kung guardian ang magkuyog sa menor-de-edad gikinahanglan ang ‘Authorization’ ingon man valid ID sa ginikanan.

Sumala sa Department of Health Regional Office XI, hangtod Abril 3, 2022 ang tibuok Davao del Norte anaa pa sa 74.8% first dose samtang 66.2% ang nakadawat sa second dose sa target nga 863,163 ka tawo (80% sa tibuok populasyon sa probinsya).

Ang DavNor maoy ikaduha sunod sa Davao City maylabot sa gidaghanon sa gibakunahan taliwala sa lima ka probinsya sa Rehiyon XI.

******************///

 

 

 

 

 

 

 

DavNor News

nainggo