MIDAGHAN ang ani sa mga mag-uuma-benepisyaryo sa KAwsa sa AGrikulturA ug PAnginabuhian sa barangaY (KAAGAPAY) pagsulod sa tuig 2022.

Sa rekord sa Provincial Agriculture Office (PAGRO) gikan Enero hangtod Marso 2022, miabot na sa 205,909 kilos klase-klaseng gulay ang na-harvest sa 387 ka mga mag-uuma-benepisyaryo. Kini maoy 93% nga pag-uswag gikan sa 192,010 kilos nga ani sa unom ka bulan Hulyo-Disyembre 2021 sa 475 ka mag-uuma.

Kini nga gidaghanon mao lamang ang natala sa PAGRO walay labot niadtong deretso gibaligya sa mag-uuma sa ilang mga “suki.”

Kahinumduman nga gilusad ni Gobernador Edwin “Kuya Gov” Jubahib niadtong Hunyo 2020 ang KAAGAPAY aron masagubang ang kanihit sa pagkaon gumikan sa mga lockdowns tungod sa COVID-19. Linibo nga semilya sa klase-klaseng gulay ang giapod-apod ngadto sa gustong magtanom apil na ang libreng abono. Ang produkto sa mag-uuma paliton pagbalik kung gusto nila nga ibaligya sa KAAGAPAY pinaagi sa marketing arm nga Davao del Norte Investment Promotions Center (DNIPC).

Gawas sa mga binhi ug seedlings, ang suporta nga duha ka kilo 14-14-14 “complete” fertilizer matag benepisyaryo gitunol sab atol sa Pebrero 22 hangtod Marso 24 nga Oplan TApok sa BArangay sa Nanginahanglan ug Galisod (Oplan TABANG) aron makadaginot sa gastos ang mga mag-uuma ilabina nga nagmahal pag-ayo ang mga palitonon.

Sa Enero-Marso 2022 nga produksyon nanguna ang KAAGAPAY Semong Agro-Forest Association (KASAFA) sa Kapalong, DavNor nga dunay katibuk-ang 101,215 kilos nga harvest. Kaduha sa isa ka semana gikumpra sa DNIPC ang produkto sa KASAFA.

*******************////