Nagsilbing ‘wake-up call’ sa mga paddlers sa Probinsya sa Davao del Norte ang 2022 Governor’s Cup nga gi-ablihan niadtong Abril 23 sa East Wing, Gmall of Tagum, ug natapos ra sab sa misunod nga adlaw.

Gipasabot ni Provincial Sports and Youth Development Office (PSYDO) Head Giovanni I. Gulanes nga ang nag-unang tumong sa Governor’s Cup karong tuiga mao ang pagpukaw sa nahikatulog nga kahinam ug kahanas sa mga atletang dugay na nga wala kadula tungod sa pandemya.

“This game… is a wake-up call, is a signal again to start practicing again… Kini nga tournament gibalik nato to send a signal sa mga players nga panahon na para mubalik ta og praktis… Kay kabalo ko sa inyong gibati. Laay kaayo ang mag-praktis kung wala tay ginapaabot na tournament… Mas inspirado ta mu-praktis kung naa tay gina-look forward 1 month from now, 2-3 months from now, adunay tournament,” ingon ni Gulanes.

Midugang og sulti si Davao del Norte Table Tennis Federation (DNTTF) President Kenneth Basong nga dako ang iyang gibating kalipay dihang nagkita na usab pinaagi niini nga torneyo ang mga table tennis players human sa pipila ka tuig nga natanggong sa ilang mga panimalay.

“Dako kaayo namong pasalamat nga naay initiative si Governor Edwin Jubahib nga nagpadula siya… Murag wake-up call ni siya sa mga player nga na-istambay og pila ka-tuig, walay dula dula tungod sa pandemic—COVID. So dako kaayo namong pasalamat at least natapok na pud ang mga players gikan ni sa nagkalain-laing lugar sulod sa Davao del Norte, pinaagi sa table tennis. Nalipay ming tanan nga at least nakapasugod na pud og tournament sa sulod sa pila ka tuig,” pahayag ni Basong.

Atol sa duha ka adlaw nga kompetisyon, nag-atbangay ang kapin 50 ka mga partisipante sa mga kategoryang Men's Open (Singles), Women's Open (Singles), Boy's Open (16 Under Singles), Girl's Open (16 Under Singles), ug Mixed Doubles.

Apan ang mosunod mao ang gideklarar nga mga mananaog sa nagmalampusong 2022 Governor’s Cup Table Tennis Tournament:

Sa kategoryang Men’s Open (Singles), midaog si AV Francis Secretaria isip 3rd Runner-Up, Neil Mark Concepcion isip 2nd Runner-Up, Charlon Almazan isip 1st Runner-Up, ug Benito Gallardo isip KAMPEON.

Sa kategoryang Women’s Open (Singles), giila si Zyra Pelecio isip 2nd Runner-Up, Jianne Pauline Beleno isip 1st Runner-Up, ug Caressha Faye Bernaldez isip KAMPEON.

Sa kategoryang Boy’s Open (16 Under Singles), nadawat ni Julliane Tagaca ang pasidungog isip 3rd Runner-Up, Prince Xavier Coquilla isip 2nd Runner-Up, Kian Cedrick Pantino isip 1st Runner-Up, ug Earl Laurencio Antipolo isip KAMPEON.

Sa kategoryang Girl’s Open (16 Under Singles), nasakmit ni Jhenny Lou Molino ang kadaugan isip 3rd Runner-Up, Mari Stella Ybañez isip 2nd Runner-Up, Elaine Durato isip 1st Runner-Up, ug Dee Anne Enaro isip KAMPEON.

Samtang sa kategoryang Mixed Doubles, gideklarar sila Oddysey Amargo ug Elaine Durato isip 3rd Runner-Up, Edwin Enaro ug Dee Anne Enaro isip 2nd Runner-Up, Jianne Pauline Beleno ug Neil Mark Concepcion isip 1st Runner-Up, ug Caressha Faye Bernaldez ug AV Francis Secretaria isip KAMPEON.

Mapasalamaton si Caressha Faye Bernaldez, kanhi magdudula sa De La Salle University (DLSU) Lady Paddlers kinsa midawat sab og duha ka gold medals sa maong torneyo, nga bisan pa man sa pagpadayon sa iyang self-training sa ilang balay, ang 2022 Governor's Cup Table Tennis Tournament mao gayud ang nakapabalik sa iyang kahanas sa pagdula isip unang torneyo nga naapilan sukad sa pandemya.

“Sa among case, kay naa man mi table sa balay, so everyday gihapon ang akong training. Daily gihapon… two years na gyud ang nilabay, wala gyuy tournaments nga naapilan namo… Thankful mi kay tungod aning Governor’s Cup, nakabalik na og dula. Naghinay-hinay na og back to normal, tapos na-apply pud namo ang training sa tournament,” saysay ni Bernaldez.

Samtang gipasalig ni PSYDO Head Gulanes nga sinugdanan pa lang kini sa pagbalik sa mga torneyo ug uban pang matang sa sports and wellness activities nga ipahigayon sa Probinsya sa panguna ni Governor Edwin “Kuya Gov” I. Jubahib.

Writer: Gwyn Kelly O. Lobitos

 

 

 

 

 

DavNor News

nainggo