Gipasidunggan na sab sa nasyonal nga panggamhanan si Governor Edwin “Kuya Gov” Jubahib isip “Peace Partner” human kini nagmadaugon sa iyang pakigbatok sa armadong pakigbisog sa probinsya nga miresulta sa pagsurender sa kapin 3,000 ka mga rebelde, “zero recruitment rate”, ug mas mubo sa singko porsyente nga presensya sa mga rebelde sa Davao del Norte base sa datos sa Armed Forces of the Philippines.

Malipayon nga gidawat sa goberndor ang “plaque of appreciation” gikan sa Office of the Presidential Adviser on Peace, Reconciliation and Unity kon OPAPRU atol sa gipahitabong Peace Partners’ Recognition Day 2022 sa Philippine International Convention Center, Pasay City, Manila, Mayo 16.

Si Kuya Gov mao ang isa sa pinaka-unang gobernador nga mipasikad sa iyang suporta sa Executive Order No. 70 ni Presidente Rodrigo Duterte sa pagtapos sa local communist armed conflict kon ELCAC alang sa episyente ug malinawon nga paghatod sa mga inisyatibo alang sa social development ngadto sa mga huyang nga komunidad, lakip na ang pag-ayo ug pagtukod og dose-dosenang kadalanan, dugang eskwelahan ug classrooms, disenteng mga panimalay alang sa mga kabus ug IPs, mga serbisyo alang sa kahimsog sa panlawas, panginabuhi, ug uban pang mga proyekto. Tungod sa iyang paningkamot kauban ang mga opisyales sa mga lokal nga panggamhanan inubanan sa kapulisan, kasundaluhan ug nagkadaiyang stakeholders, mas nakabaton og hapsay, malinawon ug malipayong kinabuhi ang mga Dabaonon.