BISAN walay investment apan naka-payout gihapon ang mga benepisyaryo sa KAwsa sa AGrikulturA ug PAnginabuhian sa barangaY kun KAAGAPAY.
“Happy kaayo ko sa programa sa atong Gob bahin sa atong KAAGAPAY manokan. Naa na mi manok, naa pa gyod mi cash assistance nga nadawat. Kaming mga mag-uuma sama namo nga mga pobre, dako jud kaayo siya’g katabang sa among pamilya. . Sa among nadawat nga kwarta para na ni sa among pamilya, pamalit namo og bugas,” pahayag ni Normalyn Bebat usa sa 23 nga membro sa Pulang Lupa, Del Monte KAAGAPAY Farmers Association sa Del Monte, New Corella.
Kahinumduman nga gumikan sa COVID-19 pandemic, gilusad ni Gobernador Edwin “Kuya Gov” Jubahib ang KAAGAPAY aron masagubang ang kanihit sa pagkaon ug kawad-on dala sa sigeng lockdown niadtong 2020.
Kadaghanan sa mga benepisyaro sa KAAGAPAY maoy mga “gagmay” sa katilingban nga nahimong kwalipikadong benepisyaryo sa Cash for Work program sa Department of Social Welfare ug sa Tulong Panghanapbuhay sa Ating Disadvantaged/Displaced Workers kun TUPAD program sa Department of Labor & Employment (DOLE).
“Sa among pagtrabaho sa kulongan naa na mi cash nga madawat sa ten days, tag 396 per day. Naa pa gyod mi manok, naa pa gyod mi cash,” dugang ni Normalyn.
Ang Person With Disability (PWD) nga si Elorde Kigod gikan sa Macgum, New Corella membro sab sa KAAGAPAY nga nananom og gulay.
“Three Thousand Nine Hundred Ninety-Six. . Pasalamat sa alalay nga nakatabang ginagmay panginabuhian namo, si Governor Edwin Jubahib. Siya may naghatag og programa sa ginagmay nga panginahanglanon nga materyal, pasalamat pod ko sa iyahang pagsuporta sa programa sa KAAGAPAY, pasalamat pod ko sa iyaha,” malipayon nga mitubag si Elorde human nakadawat sa P3960 adtong Mayo 5 aron ipalit og pagkaon.
Si Ashiya Balid nga taga Braulio E. Dujali mapasalamaton kaayo nga naapil sa Cash for Work.
“Naapil ko aning KAAGAPAY sa poultry ni Kuya Gov Edwin Jubahib. Nakadawat ko og 3,960 pesos. Nalipay kaayo ko kay dako kaayo ning tabang para sa akoa labina na karon nga pandemic, akong bana walay trabaho, dakong tabang ni para sa akong mga anak. . Akong gamitan aning kwarta akong ipamalit sa groceries para sa among panimalay,” malipayong tubag ni Ashiya.
Sa pagkapili ingong gobernador sa Davao del Norte alang sa ikaduhang termino, gisaad ni Kuya Gov nga iyang ipadayon gayod ang KAAGAPAY kay kini padayong nag-alalay sa mga gagmay ilabina sa mga mag-uuma sa tibuok probinsya. [camera/Roel M.]
