TIMES THREE ang produksyon sa gulay ug midaghan sab ang ganadong miapil sa food-sufficiency program ni Gobernador Edwin “Kuya Gov” Jubahib nga KAwsa sa AGrikulturA ug PAnginabuhian sa barangaY kun KAAGAPAY.
Kahinumduman nga niadtong Enero hangtod Marso 2022 base sa rekord sa Provincial Agriculture Office (PAGRO), 205,909 kilos klase-klaseng gulay ang na-harvest sa 387 ka mga mag-uuma-benepisyaryo nga maoy 93% pag-uswag sa unom ka bulan nga ani Hulyo-Disyembre 2021 nga 192,010 kilos.
Apan duha ka bulan lang ang milabay nadugangan kini og 446,011 kilos nga ang total gidaghanon hangtod Mayo 31, 2022 miabot 651,920 kilos klase-klaseng gulay. Sa duha ka bulan nadugangan sab ang mga benepisyaryo nga miapil sa KAAGAPAY og 270 nga nahimong 657 na ka mga benepisyaryo sa KAAGAPAY gulay produksyon.
Sumala ni Provincial Agriculturists Office (PAGRO) Assistant Department Head Engr. Leonilo Patayon nga bisan kung ang probinsya migasto og duolan Dos Milyones pesos alang sa pagpalit sa gihangyo nga “East West” seeds apan napamatud-an nga mas midaghan ang ani sa mga mag-uuma.
Kini nga gidaghanon mao lamang ang natala sa PAGRO walay labot niadtong deretso gibaligya sa mag-uuma-benepisyaryo sa ilang mga “suki.”
Kahinumduman nga gilusad ni Kuya Gov niadtong Hunyo 2020 ang KAAGAPAY aron masagubang ang kanihit sa pagkaon gumikan sa mga lockdowns tungod sa COVID-19. Linibo nga semilya sa klase-klaseng gulay ang giapod-apod ngadto sa gustong magtanom apil na ang libreng abono. Ang produkto sa mag-uuma paliton pagbalik kung gusto nila nga ibaligya sa KAAGAPAY pinaagi sa marketing arm nga Davao del Norte Investment Promotions Center (DNIPC).
Gawas sa mga binhi ug seedlings, ang suporta nga duha ka kilo 14-14-14 “complete” fertilizer matag benepisyaryo gitunol sab aron makadaginot sa gastos ang mga mag-uuma ilabina nga nagmahal pag-ayo ang mga palitonon.
Sa talaan sa PAGRO nanguna ang People’s Organization nga KAAGAPAY Semong Agro-Forest Association (KASAFA) sa Kapalong nga dunay katibuk-ang 423,414 kilos nga harvest. Kaduha sa isa ka semana gikumpra sa DNIPC ang produkto sa KASAFA.
*******************////
