Walay pagduha-duha nga gitambakan sa Talaingod Lady Wakandas ang One Team New Force Spikers, 25-22, 25-15, 25-19, atol sa 2022 Governor’s Cup Volleyball Championship Women’s Open Category niadtong Sabado, Mayo 28.

Wala na mag-usik og panahon ang Lady Wakandas sanglit ila na dayong gidaog ang unang tulo ka sets sa maong five-set match.

Nahimong usa ka 'challenging match’ ang first set tali sa duha ka teams nga nagbinayloay og tag-as nga rally ug nagpulihanay lang og lead sa score. Apan, naangkon sa Lady Wakandas ang unang kadaogan tungod sa sunod-sunod nga service errors sa New Force Spikers sa katapusang mga minuto sa opening set.

Sa misunod nga mga sets, hingpit na nga gidominar sa Lady Wakandas ang duwa pinaagi sa ilang lig-on ug dili matag-an nga mga spike nga nagbilin sa kontra sa campfire position sa makadaghang higayon.

Matod ni Bobby Jons P. Sinco, coach sa Talaingod Lady Wakandas, kinsa midaog sab isip ‘Best Coach’, gipaniguro sa ilang team nga dili mokompyansa ug nga mohatag gayud sa ilang ‘best shot’ gikan sa sinugdanan hangtod sa katapusan sa duwa.

“Ang akoa lang gyu’ng advice sa akong mga bata, always play strong. Dili gyud maghatag og chance sa kalaban. Always start strong gyud. Kay kung dili ta mudula, kita man gyud ang mapildi”, sulti ni Sinco.

Dugang pa sa team coach nga ang pag-apil sa nagkadaiyang mga liga sa volleyball mao ang usa sa basic training strategies sa Lady Wakandas. Hinungdan nga dako ang ilang pasalamat sa Probinsyal nga Panggamhanan sa pagpahigayon sa 2022 Governor’s Cup.

“This is actually an avenue para sa atoang mga grassroots—young athletes nga maningkamot pud nga kanang mudula gyud sila’g volleyball. Maka-inspire sa ilaha, maka-motivate, ug maghatag gyud sa ilaha og opportunity para makadula pud on bigger stages”.

Gihakot sab sa Talaingod Lady Wakandas ang tanang individual awards alang sa Volleyball Women’s Open Category—Best Outside Hitter, Best Opposite Hitter, Best Blocker, Best Setter, Best Libero, Best Server, ug MVP.

Writer: Gwyn Kelly O. Lobitos

 

 

 

DavNor News