DUOL NA GYOD ang Davao del Norte sa “herd immunity” apan nagpabiling ubos gihapon ang vaccination rate kontra COVID-19 alang sa mga A2--mga Senior Citizens sa probinsya.
Ang herd immunity o’ community immunity maabot dihang ang kinabag-an sa populasyon sa komunidad na-“immune” sa sakit pinaagi og bakuna o kaha na-immune gumikan kay ang kinabag-an sa katawhan natakdan na sa maong sakit.
Sa paningkamot sa mga Municipal Health Offices sa matag 11 ka LGU lakip na ang Provincial Health Office nga mitabang og pang-bakuna matag Huwebes ug Byernes, hangtod alas 8 sa buntag Mayo 3, 2022, ang record sa Department of Health Region XI nagpakita sa DavNor 78.3% first dose vaccination rate samtang 69.8% na sab ang second dose (lakip niini ang J&J single dose ug booster shots).
Giisip nga kung makab-ot ang 70% sa angayan bakunahan nga populasyon, ikaingon nga naabot niini ang herd immunity.
Sa 3 ka syudad sa probinsya, nanguna ang Panabo City sa 84.% first dose vaccination rate ug 75.2% second dose vaxx rate samtang ang Tagum City, nga mao ang sentro sa Davao del Norte naabot na ang 84.1% ug 74.2% first ug second vaccination rate.
Apan namatikdan nga gumikan sa kaubos sa vaccination rate sa A2 kun Senior Citizens, lisod makab-ot sa Davao del Norte ang pinakaubos nga Alert Level 1 klasipikasyon sa Inter-Agency Task Force for the Management of Emerging Infectious Diseases kun IATF.
*****************///
