Nagpabiling kalmado ug malampusong gipildi sa RPVA Tagum ang Talaingod Rainbow Wakandas bisan pa man sa kulbahinam nilang duwa, 25-20, 26-24, 25-21, sa Championship Game sa 2022 Governor’s Cup Volleyball Tournament LGBTQ+ Category.

Gihakot sa RPVA Tagum ang kadaogan sa unang tulo ka sets, apan taliwala niini wala gayud nahimong sayon nga ‘match’.

Human nagpulipuli ang parehong teams sa pagpanguna sa iskor atol sa tibuok first set, naglisod na og gukod ang Rainbow Wakandas dihang misakmit ang RPVA og upat ka sunodsunod nga puntos.

Labi pa nga “nerve-racking” ang extended second set nga hapit gayud naangkon sa Rainbow Wakandas, 26-24.

Gidominar sa Rainbow Wakandas ang unang mga minuto sa ikaduhang set nga nagbiya sa RPVA sa 5-1 nga baraha.

Apan gitapos dayon sa RPVA ang momentum sa Rainbow Wakandas ug gipapas ang gintang ngadto sa 8-8 dihang miiskor sila og laing upat na sab ka sunodsunod nga puntos.

Bisan pa sa hangak nga duwa nga napuno og tag-as nga back-and-forth rally ug alternate lead claims, gisiguro sa RPVA nga sila kanunay ang makaangkon sa kataposang kadaugan pinaagi sa quick strong attacks ug established blocks niini.

Matod ni Julius Royo, Team Captain sa RPVA Tagum kinsa giila sab isip Best Outside Hitter ug Most Valuable Player (MVP), “super tight” gayud ang ilang duwa batok sa Rainbow Wakandas, apan ang nakita niya nga lamang sa ilang team mao ang lig-on nga pagtinabangay ug lapad nga kasinatian sa pag-apil og lainlaing mga liga sa volleyball.

“Syempre sa Home Court advantage. Ug lamang jud kaayo mi because sa taas namong bond. From naga dula mi sa Rotary- Bisag asa na mga liga, kami gihapon jud”, saysay ni Royo.

Sulti sab sa RPVA Team Captain nga aduna gayud dako nga kabag-ohan sa ilang dinulaan sa wala pa ug human sa pandemya.

“Daghan kaayo- ang adjustment, ang pa-kondisyon sa among lawas, for muscle, physical condition… pati emotional, tanan tanan jud”.

Kahinumdoman nga ang RPVA Tagum ug Talaingod Rainbow Wakandas mao sab ang nag-atbang sa Championship Game sa miaging Governor’s Cup Volleyball Tournament niadtong 2019.

Writer: Gwyn Kelly O. Lobitos

 

 

 

DavNor News

nainggo