Isip timailhan sa maayong panggobyerno ubos sa pagdumala ni Governor Edwin “Kuya Gob” Jubahib, nakapasar sa 2021 Seal of Good Financial Housekeeping ang probinsiya sa Davao del Norte, uban ang upat ka mga local government units (LGUs) niini.

Sa dokumento nga gimantala sa website sa Department of Interior and Local Government (DILG), nasulod na sa dugang nga listahan sa mga LGUs nga nakapasar sa maong award ang lalawigan sa Davao del Norte, kuyog ang mga dakbayan sa Tagum ug Panabo ug sa mga lungsod sa Kapalong ug Talaingod.

Ang Seal of Good Financial Housekeeping (SGFH) ginahatag sa DILG alang sa mga LGUs nga nakapakita og maayong performance sa financial transparency ug nakahimo sa maayong sistema sa fiscal accountability, kon tulubagong pinansiyal, diin rekisitos sa maayong panggobyerno.

Nalipay kaayo si Governor Edwin “Kuya Gov” Jubahib sa maong pasidungog kay mihatag kini og bug-at nga testimonya sa iyang maayong pagdumala, nga inungdan sa iyang bag-ong kadaugan sa iyang pagpapili pag-usab isip gobernador sa miaging piniliay.

Ang SGFH dunay tema nga “Tama at Maayos Na Serbisyo,” nga mao usab ang kampanya sa administrasyon ni Kuya Gov alang sa tinuod, inklusibo, balanse ug maluntaron nga kalamboan alang sa tanang Dabaonon.

Gikan sa pagsugod sa award sa tuig 2011, permanente na nga makadawat ang Davao del Norte sa SGFH, diin gi-level up kini aron mamugna ang Seal of Good Local Governance (SGLG) sa tuig 2014.

Sagunson ug walay sipyat nga nakuha sa probinsiya ang SGFH sa siyam ka tuig, hangtud nga gisuspende sa DILG ang award niadtong tuig 2020 ug 2021 tungod sa pandemya.

Makadawat og financial incentive ang mga LGU-awardees gikan sa nasyonal nga panggamhanan, apil ang Performance Challenge Fund (PCF), diin ang mga dumadaog nga probinsiya makadawat og P7 million, samtang P3 million alang sa mga dakbayan ug P1 million alang sa mga lungsod.

Lakip sab niini ang dugang kagawasan aron makapangita’g dako-dako nga pundo ang mga LGUs alang sa ilang mga programa’g proyekto.