Sukwahi sa ilang pagtuo nga ginadagmalan ug ginapasagdan sa gobyerno ang mga kabus ug huyang, napamatud-an sa upat (4) ka mga rebelde nga usa lamang kini ka ‘false propaganda’ dihang sila misurender sa Davao del Norte.
Dala ang mga high-powered firearms, mapaubsanong misurender ang duha ka manggugubat sa grupong Front 27 ug duha ka miyembro sa Militia ng Bayan (MB) niadtong Hunyo 3, 2022 pinaagi ni Governor Edwin I. Jubahib ug sa panguna ni Davao del Norte Police Provincial Office (DNPPO) Provincial Director Police Colonel Antonio D. Alberio Jr.
Sa usa ka ekslusibong pakighinabi, gibutyag nila Alyas “Ella”, 18, ug Alyas “Rigor”, 22, nga ‘nailad’ sila sa propaganda sa mga rebelde nga naghulagway sa NPA isip tigpanalipod sa mga kabus nga matod pa ‘ginapasagdan’ kuno sa gobyerno.
“Subay sa ilang ginaingon, kanang dili daw mutabang sa nanginahanglan. Pero mutabang diay sila… Layo ra jud kaayo. Murag ginalumos ra mi nila’g prop. Mu-ana sila nga black prop, tapos tinuod gyud diay na dili gyud diay siya black prop… Ilang prop didtoa sa taas kay murag ginaduot ang gobyerno. Lahi ra diay siya”, ingon ni Ella.
Samtang kakapoy, kagutom, ug kapit-os ang mitultol sa pagsurender ni Rigor human sa lima ka tuig nga pakigbisog niini sa kabukiran sukad 2017.
“Tungod lang sa kakapoy ba. Kapoy na, tapos gusto na mubalik-loob ba. Kapoy na ning dagan-dagan, sukol sa gobyerno… Sa pag- kanang lakaw pa lang daan, pagkaon, mao nay lisod didto… Kanang unya, imong kinabuhi gitahan na nimo”, saysay ni Rigor.
Kung ikumpara ang ilang kinabuhi sa bukid diin walay hunong ang lakaw ug kanunay silang nag-antos sa kagutom ug kapeligrohan, sulti ni Ella ug Rigor nga “wala ra katunga” sa kasinati-an nila karon dihang mibalik na sila sa sabakan sa gobyerno.
“Maghatag daw og livelihood, housing… Maayo man pud ilahang offer pud kaysa didtoa wala jud ba bisag pabahay ing-ana tas ang mga command ray naay balay…Ilang prop didtoa sa taas kay murag ginaduot ang gobyerno. Lahi ra diay siya. Pasalamat pud mi kay naay program ang gobyerno nga ing-ani”, butyag ni Ella.
Positibo si DNPPO Provincial Director PCOL Alberio nga ang rason nganong daghan ang ganahan mu-surender sa Davao del Norte tungod sa maayong pagpatuman niini sa Executive Order No. 70 o ang End Local Communist Armed Conflict (ELCAC) ug ang daghan pang benepisyo nga ginatanyag sa Probinsya alang sa mga musurender.
“Maayo ang pagpatuman sa Davao Norte sa Executive Order No. 70, kaning atoang ELCAC. So, ganahan sila nga mu-surender pud dinhi sa Davao Norte tungod kay maayo pud ang pagpatuman sa atoang mga Local Government Unit… Labi na nang remuneration sa ilahang baril nga gi-surender. So kung unsa ang kantidad sa baril, so doblehon na siya. Aside ana, naay financial pud nga ihatag ang gobyerno mahitungod ana… Ang diri sa Norte naa tay ihatag gani nga pabahay. Naa tay housing diri sa NHA nga in fact, karon, aduna nay mga lumulupyo nga mga former rebels didtong dapita”, pasabot ni PCOL Alberio.
Isip hinanaling tabang, gihatagan sa Probinsyal nga Panggamhanan nga gipangunahan ni Governor Jubahib ang upat ka mi-surender nga Former Rebels og lima (5) ka sakong bugas, baynte (20) ka kahon nga noodles ug aduna pay immediate cash assistance nga tinig tres mil (P3,000.00) ang matag usa.
Misaad sab ang Gobernador nga iapil sila sa libreng educational scholarships ug TESDA training aron ilang makat-onan ang mga pamaagi ug teknolohiya nga makapahimo nila og malungtarong panginabuhian alang sa ilang maayong kaugmaon.
